Iss Article mein hum Introduction ke baad Quran ke bare mein Quran hi mein jo bayan kiya gaya hai phir ahadith aur tareeq mein jo kaha gaya hai, pad’henge.
Sab se pehle iss baat ko zahan nasheen karlen ke Deen – e – Islam ki Qanooni kitab Quran hai aur iss ka sahih interpretation (Tafseer) ya to hum ko Ahadeeth se mil sakta hai ya phir sahaba ikram ki zindagi se.
Deen ya mad’hab ka matlab yeh hai ke Allah ne Insaanon mein se kuch Hastiyon (Logon) ko chuna jinko hum Nabi ya Rasool kehte hai takey woh aam insaanon tak ek paigham pohanchaey jo Allah ke Wajood, Allah ki Wahdaniyat aur usski Qudrat ke bare mein logon ko bataey; taakey insaan Allah ke samne jhuk jaye.
Tableegh ka maqsad yeh hai ke Allah ki maqlooq Allah ke samne jhook jaye, kyun ke Allah ne hum ko choice di hai ke hum usske ahkaamat ko follow kare ya na kare. Doosri maqlooq ko yeh choice nahi di gayee hai jaise sooraj ko mashriq (east) se nikalna hai to woh maghrib (west) se nahi nikal sakta, Allah ne in cheezon ka program likh diya hai aur woh uss per chal rahe hain.
Quran mein jo Qanoon aya hai usska ek maqsad yeh hai ke Insaan Allah ke Wajood ko manle, usski wahdaniyat ko aur usski Qudrat ko maney aur yeh samajhle ke tamam (total) Qudrat Allah ke haath mein hai iss kayenat ko chalane ke liye.
Aur yeh ke Rasool aur nabi jo bhi uss zamane mein aye hai unke bataye huwe tareeqe par Insaan Allah ke samne jhook jaye aur apni marzi na chalaye ya apna tareeqa na ijaad kare, kyun ke phir yeh bid’at ho jaye gi. Is ski misaal aisi hai ke, Kaba ka tawaf karne ke liye humein saat (7) chakkar lagaane hote hain, agar koi ye sonche ke wo saath sau (700) chakkar lagane ke qaabil hai aur wo aisa kare to ye Rasoolullah SAWS ki sunnath ke qilaaf hoga, sirf saat chakkar lagana tawaf ke liye kaafi hai aur yehi masnoon hai.
Abh ye baat ko samjhen ke Allah ne itne Rasool kyun bheja, Adam AS se lekar Rasoolallah SAWS tak, Musnad Ahmad Hadith 21257 mein aata hai ke 125,000 nabi aur rasool aye hain, itney nabiyon aur rasoolon ki kya zaroorat thi?
Tareeq se hum ko pata chalta hai ke insaanon ki tareeq muqtalif darjon se guzri hai, jaise kisi ne bohot hi achcha samjhaya ke Adam AS ki shariyat ka sirf ek ki point tha aur woh yeh tha ke iss daraqt ka phal nahin khana hai, jaise jaise aabadi badhti gayee, masley masail badhtey gaye aur jab logon ney apne faidey ke liye Allah ke Qanoon ko badal dala, to Allah SWT ne apne nabiyon aur rasoolon ke zariye se insaanon ki islah ki. Aur akhir mein Allah ne ek final legislation ya Akhri Qanoon ke taur per iss Quran ko Rasoolallah SAWS ke zariye se hum tak pohonchaya.
Ab Quran ke bare mein hum ko chand maloomat hasil karna hai, aur kyun ke Allah ke Rasool SAWS ki woh hadees jo Bukhari se riwayat hai, aap SAWS ne farmaya ke main tum mein do cheezen chhore jaa raha hoon, jab tak in ko pakde rahoge kabhi gumraah na hoge, woh hai Allah ki kitab aur meri sunnath. (Muwatta Imam Malik Book 46, Section 1, Hadith 3)
Issi liye hum pehle Quran ko Quran hi se samjhne ki koshish karenge aur phir ahadees aur tareeq mein isske bare mein kya kaha gaya hai samajhne ki koshish karenge.
Quran Apne bare mein kya kehta hai?:
- Allah SWT ne Mohammed SAWS ko Quran ata kiya (27:6), iss baat se Quran ka source aur kissko diya gaya yeh pata chalta hai.
- Quran ka musannif ya author Allah SWT hai (13:37) aur koi doosra aisi kitab to kya ek surat nahin likh sakta. Quran mein Allah ne challenge kiya hai ke agar tum chaho to aisi ek kitab (28:49), ek surat (2:23) ya ayat bana laao, kyun ke kaafir kehte hain ke rasoolallah SAWS ne iss Quran ko likha hai, jo ke bilkul jhoot hai issi liye Allah SWT ne yeh challenge diya ke agar chaho to mere alawa jin jin ko pukartey ho unki madad lelo, lekin tum iss jaisi ek surat bhi nahin bana saktey ho (2:23).
- Quran ek mahfuz kitab mein jama’ hai jiss ko Quran ne ‘Kitaabim-maknuun’ aur Louhim Mahfuuz’ kaha hai (56:78). Jo ke Jibrael AS ke zariye Allah SWT ne Mohammed SAWS ke Qalb (Dil) per arabi zuban mein nazil kiya (2:97).
- Kayee ilhaami kitaben, jaise ke, taurait, zuboor, injeel ki original language hum ko nahin pata hai aur woh current language nahin hai, lekin Allah ke fazal se Quran arabi mein nazil kiya gaya jo ke aaj 56 Muslim countries ki official language hai, yani iski grammer aur vocabulary salaamat hai arabi samjhney ke liye hum ko koi masla nahin hai. Ek point yahan note karne ke qabil hai ke jo Quran mein tareeqi waqayat aye hain unka zikr Allah ne Quran mein translate ker ke hum tak pohonchaya hai, jaise Nuh AS ka unki qaum ke saat guftagoo karna ya Moosa AS ka Firawn se kalaam karna, yeh baat cheet arabi zuban mein nahin huwi balke unki apni zubanon mein huwi theen, jisko Allah ne hum samjhane ke liye arabi mein translate kiya, iss se yeh maloom hota hai ke hum Quran ko samajhne ke liye tarjumon ka sahara le sakte hain.
- Aur Quran ki yeh qaas baat hai ke kisi cheez ko samjhane ke liye Allah SWT ne alag alag alfaaz ke istemal se baataya hai taakey hum ko samajh ajaey.
- Quran ka nuzul Lailatul Qadr mein shuru hua, jo ke ek mubarak raat hai mah e Ramadan mein, woh aisi raat hai jiss mein faaidamand cheezon ki badhotri hoti hai. Issi ki khushi mein hum log Ramadan ke mahine mein roze rakhtey hai. (97:1-5)
- Quran ka nuzul kayee hisson mein hua waqfe waqfe se hota raha, Quran ko ek saat nazil nahin kiya gaya. Iss ki wajah Allah SWT Surah Hashr (Chapter 59) ki ayat 21 mein bayan karta hai ke “Agar hum iss Quran ko kisi pahad par nazil karte to aap ussko dekhtey ke woh Allah ke khauf se toot ker reza reza ho jaata….” Issi liye Allah SWT ne apne Rasool SAWS ke dil ko qayam rakhne ke liye kayee hisson mein 23 saal ke arsey mein nazal kiya.
- Ahadeeth mein kayee ek waqayaat ka zikr hai, bataya jaata hai ke Rasoolallah SAWS jab kabhi ootni par safar karte hote aur aap SAWS par wahi nazil hoti to ootni wahi ke wazan ke baitth jaati, aur doosri hadeeth mein hazarat Zaid bin Thabit RA farmatey hain ke ek waqt main Allah ke Rasool SAWS ke saath battha tha, aap SAWS ki mandi meri mandi per thi aur aap SAWS per wahi ka nuzool shuru huwa, to mujhe aisa laga ke mera pair toot kar chaknachoor ho jayega, aap SAWS passeena passeena ho jate aur pareshan ho jaate the, aisi kitab agar 23 saal ke arsey ke bajaaey Allah SWT ek saat Rasoolallah SAWS ke qalb per nazil karte to aap ka qalb sabit nahin rah pata.
- Allah SWT Quran e pak ki hifazat ka zimmah liya hai issi liye iss mein jhoot nahin dakhil ho sakta. Iss baat ko humein zehan nasheen karma hai aur Quran ko iss yakin ke saat padhna hai ke iss kitab ki har ek baat sachchi hai.
- Quran ko padhne, jama karne aur samjhane ka zimma bhi Allah hi ne liya hai. Iss ki bina per hum ko iss baat ka qayal rakhna chahiye ke kisi aalim ki baat jo ke Quran ke mutalleq ho agar samajh aajaye to Alhamdulillah kahen kyun ke uss aalim ko Allah hi ne samjhaya hai jiss ki wajah se woh hum tak baat ko pohoncha raha hai. Allah jiss ko chahta hai usske seene ko Quran ke liye khol deta hai, yeh ussi ki marzi hai.
- Quran mein hamare taloq se har cheez ko samjhadiya gaya hai (12:111), agar hum hamare maslon ka hal iss mein dhoonde to hamari sari problems ka solution iss mein maojood hai, sirf iss ko samajh ker padhne ki zaroorat hai, kyun ke yeh Quran se hat ker aur koi kitab aane wali nahin hai iss kayenaat ke khatam hone tak.
- Quran mein koi cheez shak ki nahin hain, woh haq aur sirf haq hai, aur iss mein koi self contradiction nahin hai, yani iski ek ayat doosi ayat se ikhtilaaf nahin karti, aur Quran mein Allah SWT yeh farmata hai ke agar yeh humare alawa kisi aur ki taraf se publish hoti to tum iss mein ikhtilaafan kaseera paate, kayee contracdictions hotey. Lekin translations mein differences ho saktey hain, shayed issi liye aaj humare 73 firkhe hain.
- Aur yeh pichli kitabon ki tasdeeq karti hai jo isse pehle nabiyon per nazil hueen. Isse yeh pata chalta hai ke Adam AS se lekar Rasoolallah SAWS tak jitne nabi aur rasool aye hai woh sab ek hi deen, deen e islam laye hain. Kyun ke Quran hi mein Allah SWT farmata hai ke aisi koi mulk ya qaum aisa nahin jahan hum ne apna nabi na bheja ho, aur tamaam nabion ka ek hi paigham tha ‘LA ILAHA ILLA ALLAH’ Allah ke siway koi ilaha nahin hai, koi khabile ibaadat nahin hai aur taaghoot se bachtey raha, ghair khudai taqaton se bachte raho.
- Quran insaan ki hidayat ke liye nazil kiya gaya hai taake issko andheron se inkaal kar roshni mein le aaye, jannat ke raste per le aaye, mazeed yeh ke insaan apne ikhtelaafat aur jhagde isske zariye se hal kare, issko padh kar apne issues solve kare, iss se yeh pata chalta hai ke har musalman ka yeh farz banta hai ke woh Quran ko jaane, kum az kum itna to pata hona chahiye ke Quran mein kya hai aur kya nahi, tab hi hum apne masael ko iss kitab se hal kar hakte hain.
- Islami hukumatein Quran aur Sunnath hi par chalen, Allah SWT ne Rasoolallah SAWS ke zariye se aur khulafa e rashideen ke zariye se amal karwa kar bata diya ke Quran ke ahkaamaat implement kar sakte hain.
- Quran mein nasihat hai, Dozaq se chaukanna karta hai aur Jannat is khush khabri di jaati hai.
- Quran mein dawat di gayi hai ke hum isski ayaat aur kainaat per ghaur karen. Surah anbiya ki 30th ayat mein Big Bang theory ka zikr hai, “Kya in kafiron ne nahin dekha ke zamin aur aasman ek jagah they aur hum ne in ko alag kiya” Allah ki Qasam jab se yeh theory enunciate hui tab se lekar abhi tak mamela chal raha hai aur koi challenge nahin kar sakta hai, ek se badh kar ek scientific facts Quran mein bayan kiye gaye hain, agar hum Quran ko padhenge, samjhenge aur ghaur o fikr karenge to hum ko maloomat hasil hongi, kaee jagah Allah ne Quran per ghaur o fikr karne ki dawat dee hai. Iss ghaur o fikr ka maqsad yeh hai ke insan allah ke wajood ko pehchane, jab hum iss kainat per ghaur karenge to aisi aisi nishaniyan hum ko milengi jo Allah SWT ki qudrat ka suboot deti hai, isske zariye se hum Allah SWT ko pehchan sakte hai.
- Hum ko chahiye ke Quran per khud bhi amal karen aur isske zariye doosron ko bhi dawat dein. Quran ki woh ayat jiss mein Allah SWT farmata hai “tum behtareen ummat ho jo logon ke liye banaee gayi ho jo logon ko neki ki taraf dawat deti ho aur burai se rokti ho aur iman layi ho” (3:110).
- Naboowat khatam ho gayi hai, lekin naboowat ka kaam baqi hai, yeh kaam kaun karega? Ummate muhammadi SAWS hone ne ke naate, iss kaam ko hum ko karna hai, hum iss kaam ko kaise kar sakte hain? Jab Quran aur Hadees padhenge to tableegh ke qabil honge, warna aise hi tableegh karne nikal jaoge to dusron ko kya bataoge. Pehle humko Quran aur sunnat padhna hai aur amal karna hai phir doosron ko tableegh karna hai, yehi wajah thee ke Rasoolallah SAWS ki tableegh mein woh asar tha ke 125,000 sahaba hajjatul wida mein shamil huey hain, kyun ke woh role model they, unko dekh kar log islam khubool karte they aur doosri taraf hamari tableegh hai, hum log aise model hai jin ko dekh kar log bhaag jaate hain.
- Iss kitab ki shan yeh hai ke jab momin iss ko padhte hain to inn ka iman aur badh jaata hai.
- Shayaateen iss Quran ko sunne se door kar diye gaye hain, iss se yeh ishara milta hai ke Quran ko halki awaz se padhna chahiye, ho sakta hai isski wajah se shayateen door ho jayen.
- Qiyamat ke din Rasoolallah SAWS Allah SWT se shikayat karenge ke meri qaum ne iss Quran ko chhor diya tha, Quran se hijrat karliya tha, yani permanently chhor diya tha. Allah hum ko hamare mutaleqeen ko aisa bann ne se mahfuz rakhe.
- Quran ko padhne aur uss par amal karne ka hukum bhi Quran hi mein aagaya, Quran ko khamoshi se sunne ka hukum hai.
- Quran shuru karne se pehle aoozu billahi mina shaitanir rajeem padhna zaroori hai, phir usske baad bismillahi rahmaani raheem padhna zaroori hai, iss liye
- Ab yeh dekhen ke Tilawate Quran ka kya matlab hai, tilawat ke lafz to Quran ne khud samjhadiya, surah shams ki pehli ayat “Wash shamsi wadduhaha, wal qamari iza talaaha….” Suraj ki qasam aur suraj ki roshni ki qasam aur chaand ki qasam jab woh suraj ki roshni ko paltata hai (reflect karta hai) (tay laam waaw) ke madday (root word) se talaaha hai, tilawat usee se hai, hum jab bhi jo padhte hain, woh light ki wajah se padh sakte hain, yaani light paper per padh’ti hai aur reflection hone ki wajah se hum padh sakte hain, agar light nahi hogi to nahi padh sakte reflection nahin hua to nahin padh sakte, kale paper per kali ink se likha jaaye to nahin padh sakte, to tilawate ka matlab reflection hai, aur tilawat e Quran ka matlab yeh hua ke Quran aisa pad’ho, aisa samjho aur aisa amal karo ke Quran reflect kare, log humko dekh kar samajh jaayen ke yeh Quran mein hai aur yeh Quran mein nahin hai, lehaaza iss silsile mein ek hadeeth milti hai jo Aisha RA se riwaayat ki gayee hai ke ek sahabi rasoolallah SAWS ke inteqaal ke baad unki zidagi ke halaat hazrat aisha RA se daryaaft farmaaya to aisha RA ne jawab diya ke kya tum ne Quran nahin padha hai, aap SAWS chalta phirta Quran they, hadees ke alfaaz hai “Quluquhu Al Quran” aap SAWS ka behavior, character aur aap SAWS ka conduct Quran tha. Yeh woh role model tha jiss ko dekh kar 125,000 sahaba sirf hajjatul wida mein shamil huay. Aise nabi ki pairwi karne waley hum musalman hamari tooti phooti koshishon ka nateeja yeh hai ke aaj 35,000 americans are getting converted to Islam every year, agar hum log waqay hi tilaawat e Quran karenge to allahu alam kya hashar ho jaye. Quran mein ek ayat hai jo Rasoolallah SAWS aur unke sahaba ko certify karti hai, ke humne jis ko kitab dee thee, woh iss Quran ki tilawat waise hi karte hai, yani padhtey hai samjhtey hai aur uss per amal kartey hai, jaisa ke uss ka haq hai.
Ab Quran ki ayat jo important thee yahan khatam huien, aaiyyeh dekhen Quran ke barey mein ahaadees kya kehtay hain.
- Quran mein paanch cheezen hai, Halal, Haram, Mahkum, Mutashabeh aur Amsaal. Bass Halal ko halal samjo (gaaye, bakri ka gosht halal hai, uss mein kuch masley mat khada karo), haram ko haram kharaar do, sharab peena, juwa khelna, waghairah, mahkum par amal karo, yani namaz, roza, zakat, haj, waladain se acha rehna, logon ke saath acha rehana, iman dari karna hai, jo ahkaamat Quran aur hadees mein hain un par amal karna, mutashabah par iman rakho, mutashabah kya hai? Mutashabah woh hai jiss se tashbeeh dee jaati hai, yani misaal dekar jiss cheez ko samjhaya jaata hai; Arsh, Jannath dozaq yeh misalon se Allah SWT ne samjhaya hai kyun ke hum inn ko dekhen nahin, hum ko andaaza bhi nahin ho sakta hai jannat, dozak waghairah kya cheezen hai. Aur amsaal se ibrat haasil karo, yani qaumon ke tabahi ke jo waqeyat hain, jaise firawn ki qaum nahin mani hum ne unko dubaa diya, nuh AS ki qaum nahin mani hum ne unko dubaa diya, to in se ibrat haasil karo aise harakaat mat karo jis wajah se yeh log tabah huay they.
- Tum mein se bahtar woh hai jo Quran seekhey aur sikhaaye, yeh hadees suntay hi hamara zahan arabi sikhane wale ustaad par jaata hai, lekin Quran seekhna aur doosron ko sikhaney ka matlab yeh hai ke Quran per amal karna seekhna aur amal karna seekhana, yeh shaqs bahtar hota hai.
- Quran ka maher, likhne wale nek buzurg farishton ke saath hoga, jo shakhs Quran atak atak ker padhta hai aur jiss per Quran ki tilawat mushkil hai ussko dohra sawab hoga. Hum logon ka zahan aisa bana hua hai ke agar Quran ko ghalat padhogey to azab hoga, lehaza na padho to azab hi nahi hoga, quraan se hi ruk gaye (sonch kar dekhiye).
- Doosri cheez yeh hai ke hamara zahan ulama ne aisa banaya hai ke hum Quran ko nahin samajh saktey hai, apne do paise ke faidey ke liye logon ko Quran se rok diya jo ke Quran ke khilaf hai kyun ke Allah SWT kehta hai ke yeh hudallinnas hai, insaano ki hidayat ke liye ulama ki hidayat ke liye hai to nahin kaha, jo apne aap ko insaan samjhta hai woh phir koshish kare atak atak ker padhe aur samajhne ki koshish kare takey iss per amal kar sakey to Allahu alam kitna sawab milega. Ek to padh raha hai, doosre mehnat kar raha hai, Allah ki raah mein agar paseena bhi nikalta hai to Allah SWT bandey ke gunahon ki maghfirat karta hai, aur agar hum koshish kartey huay ghalti kartey hain to kya Allah humko azab dega, inshallah aisi ummeed nahin hai.
- Main tum mein do cheezen chhode jaa raha hoon Allah ki kitab aur uss ke rasool ki sunnath, jab tak in ko pakde rahoge kabhi gumraah na hoge, no third point, mukammil hai al hamdulillah yeh Quran aur hadees, hum ko aur kisi third authority ki zaroorat nahin hai.
- Hum aise cheezon ke fatwe de chuke hain jinn ke baare mein Quran aur hadees clear cut solutions batatey hai aur kisi fatwey ki zaroorat nahin hai, masalan Tallaq ka masla. Europe aur america mein 6 miheeney ka time diya jaa raha hai divorce pronounce karne ke liye, jab ke 1400 baras pehle Allah ke Rosool SAWS ke zamane mein jo 3 maheeney ka period tha uss ko mansookh kardiye fatwey de de kar. Jab ke allah ke rasool SAWS ki hadees hai “mera kalam mere kalam ko mansooq kar sakta hai, Allah ka kalam mere kalam ko mansooq kar sakta hai lekin mera kalam Allah ke kalam ko mansooq nahin kar sakta, hum kaise Quran is ayat ko mansook karaar de sakte hain.
- To rasoolallah SAWS ki iss hadees ka matlab hai ke Quran mein clear cut legislation aaga hai aur iss per amal kaise karna hai woh aapne hum ko bata diya hai apne ahaadees ke zariye. Hum logon ki zindagiyan yeh third authority ke peeche jaakar kharaab hui hai, jab kabhi bhi ulama ne koshish ki Quran aur hadees ka qanoon nafiz karne ke liye unka qatal karwa diya gaya, muslim history bhari padhi hai.
To hamare paas Allah ka final qanoon aagaya hai jiss ko hadees mein samjha diya gaya hai, yahan ahaadess ka silsila khatam hua, aaiyyeh dekhen tareeq mein kya kehti hai
- Pehli ayaat Quran ki jo nazil hui woh surah alaq ki paanch ayaat thee aur aakhree ayat surah maidah ki teesri ayat, mein ‘Al yauma akmaltu lakum deenakum’, yani humne aaj tumhara deen mukammal kar diya’ thi, lafze mukammil (kaaf meem laam) ka jo madda hai uss ka matlab perfection ka hai, takmeel tak pahuncha diya, perfect kar diya, to jo cheez perfect hai uss mein koi addition ya subtraction ki zaroorat nahin hoti, kyun ke yeh final legislation hai, iss ke baad aur koi nabi ya rasool nahin ayenge, we have the perfect stuff.
- sab se pehli surat jo ek complete surat ki shakal mein nazil hui woh surah fatiha hai, jo shaane nuzul mein fifth aati hai, yani
- surah alaq ki paanch ayaat
- surah qalam ki kuch ayaat
- surah muzzammil ki kuch ayaat
- surah muddassir ki kuch ayaat
- surah fatiha complete surah, yeh paanchwi wahi thee rasoolallah SAWS ko.
- aur aakhree surah jo nazil huwi woh surah nasar ‘iza jaa’a nasrullahi wal fat’hu…..’
- Quran mein 114 chapters hain, ek riwayat mein aata hai ke 93 suratein makki hai jo chhoti hai aur 21 suratein madni hai jo lambi hai, aur doosri riwayat mein aata hai ke 86 makki suratein hai aur 26 madni hai, yeh ek controversy hai lekin ek baat maloom hoti hai ke makki suraton mein iman develop karne wali cheezen hain aur madni surton mein poora qanoon bhara hua hai.
- sab se lambi surat surah baqara hai jis mein 286 ayat hai aur sab se chhoti surat surah kausar hai jiss mein 3 ayat hai. Surah baqara mein 40 ruku hai aur ruku subjects ke lehaaz se banaye jaate hain, kayee surton mein ek hi ruku hai.
- iss mein 30 paray aur 7 manzil banaye hai, iss ka reference bukhari ki ek hadees se milata hai, ek sahabi apni biwi ke huqooq puri tarah se nahi ada kar rahe they to rasoolallah SAWS ne unko bulaya aur unke haalaat ko daryaaft kiya, poocha ke Quran kitne din mein padhtey ho to kaha ke ek raat mein kar leta hoon, to aap SAWS ne farmaya ke iss ko 30 din mein padha karo, sahabi RA ne kaha ke main iss se zyada ki quwwat rakhta hoon to aap SAWS ne unko ijazat dee ke 7 din mein pura karlo, phir ek hadees hai aap SAWS ki jiss ne 3 din se kum mein Quran padha ussne Quran ko nahi samjha, Quran ko 3 din se kum mein padhna discourage kardiya gaya hai, phir ek raat mein hum Quran kaise khatam kar saktey hain, to matlab yeh hua ke Quran nazil hua ussko samajhney ke liye, issliye ke uss per amal karna hai, hum log Quran jitna bhi Quran padhtey hain lekin maaloom hi nahin ho raha hai ke iss mein kya hai.
- har saal jitna Quran nazil hota jibraeel AS rasoolallah SAWS ko revise karwaate they, aur rasoolallah SAWS ki zindagi ke akhri ramadan mein poorey Quran ke 2 daur karwaye (Bukhari), aap ki zindagi mein Quran ki tarteeb ho gayee thi kyun ke kayee hafiz e Quran they. Aur hazrat Abu bakr RA ki khilafat mein hazrat umar RA ne abu bakr RA se request ki ke iss Quran ko likh liya jaaye, kyun ke haafiz e Quran jangon mein shaheed ho rahe hain. Lekin Abu bakr RA iss kaam ko karne se dartey they kyun ke rasoolallah SAWS ne iss ko nahin kiya, lekin Allah SWT ne abu bakr RA ke dil ko iss kaam ke liye khol diya aur phir kaatib e wahi jo they unko bulaya gaya aur sare nuskhon ko jama karke ek kitab ki shakal di gayee, rasoolallah SAWS ke bataye huay tareeqay per.
- aur phir islam phailne laga, kaisa pheila, Umar RA ke zamane mein 220,000 sq miles per islami hukumat thee ek khalifa ke control mein, jo aaj 57 islaamic countries mein divided hai, kuch hamare dushmanon ne humko toda aur kuch hum khud toot gaye, ab islam phailne laga, to tajweed mein gadh badh ho ney lagi, har zubaan ke saath ye masala hai, ab urdu hi ko le len, north india aur pakistan mein ek tajweed hai, thoda neechey utrenge to kuch aur hojayegi, south mein phunch ker kuch bhee nahi samajh mein ayega, to tajweed mein gadh badh honay lagi, to Quran samajh ke liye gadh badh honay lagi, to Othman RA ke zamane mein quraish ki jo tajweed ka tareeqa tha uss per Quran ko likh diya gaya, 4-7 copies banaye gaye aur alag alag provinces mein distribute kar diye gaye, ek copy istanbul mein hai, ek tashkant mein aur ek copy per Othman RA ke khoon ke nishan hai woh copy tak iss waqt mahfooz hai, aap koi bhi Quran ko le jaa ker compare ker saktey hai inshallah ek lafz ka hair phair nahee milega, yeh hifazat hui hai Quran ki.
- ek aur baat samajhni hai woh yeh ke agar Quran ki tarteeb bata di gayee thee to isska kya maqsad tha? Yeh samajhna issliye zaroori hai kyun ke jo tarteeb se Quran ka nuzool hua woh aisi nahi thee, ek founder community qayam ho rahi thee to issi liye zaroori tha ke uss community ka iman badhaya jaye, phir ahkaamat wali suratein nazil hueen, kyun ke iman hoga to hi amal nikleyga. Lekin hamara muaamela aisa nahin hai, hum log founder community nahin hai, hum log by chance musalmaan ghar mein paida ho gaye, hamare samne aaj tak koi deen pesh nahin kiya, to hamara silsila aisa hai ke hum pehley Quran ke ehkaamaat per amal karte hain aur iss amal ki wajah se hamara iman develop hota hai, bilkul opposite tareeqa jo sahaba ka tareeqa tha. Issi liye Allah SWT ne yeh tarteeb di hai Quran ki pehle ahkaamat wali suratein phir iman wali suratein hai Quran ke end mein.
- ab aaiyyeh dekhen wahi par iman ke bare mein, Allah SWT ne Jibrael AS se kaha aur unho ne rasoolallah SAWS se kaha aur sara Quran aise hi nazil hua, mobile phone, tv per hamara yakeen ho sakta hai to wahee per iman laney mein koi mushkil nahee honi chahiye. Modern material jo hum istemaal kar rahey hai woh Allah SWT ne banaya hai, jo qanoon jiss per modern equipment chalte hai woh qanoon Allah SWT ne banaya hai, jo insan cell phone tv ko banaya hai woh allah ka banaya hua hai, yeh sob cheezen allah ki nishaniya hai, iss se hum ko sabaq le kar wahi per iman laana hai ke Allah SWT ne iss Quran ko hum tak ek wahi ke zariye se pohunchaya.
- last point yeh hai ke, saari kainaat ke pursukoon existance key liye laws of nature hain, jaise ke, law of gravity hai, agar gravity badh jaaye to aap hum yahan se uth hi nahin saktey aur agar kum ho jaye to sob yahan baith hi nahin saktey, ja ker chhat se takra jayenge, to allah ka jo qanoon hai saari kayenaat uss per amal kar rahi, suraj, chand, sitare aap dekhenge ke pursukoon, itne bade bade yeh aag ke goley 14 million miles suraj ka diameter, ek black hole discover kiya gaya jo ke 3 billion time heavier than the sun hai sob apne apne chakkaron mein ghoom rahe hai, suspended hain, 15 billion years se yeh kainaat chal rahi hai, lekin koi gadh badh nahi nazar aati. Issi tarah Quran ka jo kanoon hai woh insan ki zindagi ko pursukoon wajood ka qanoon hai, yeh baat hamare zahan mein rahna chahiye aur ussi tarah hum ko amal karna chahiye.
- lekin ek baat ghaur karne ke qaabil hai, ke Quran ke saath yeh na insaafi hui kaise? Rasoolallah SAWS ke zamane mein, tableegh sirf Quran se hoti thi, aap SAWS ke baad sahaba ke zamane mein tableegh hoti thi to woh Quran quote karte they allah ke rasool SAWS ki ahadees aur unke waqayat quote karte they, usske baad tabaeen aye to woh Quran, hadess aur sahaba ke waqayaat quote karne lage, to Quran half se one third ho gaya aur tabe tabaeen ke zamane mein one fourth ho gaya, kyun ke Quran, hadees, sahaba ke waqayat, tabaeen ke waqayat se tableegh honay lagi. Ab haal yeh hai ke islam ke naam per ek jalsa hota hai, jalsa to chhoden juma ke qutbe mein ek ayat Quran ki quote nahi kartey hain, to hum Quran ko chhod hi diye hain, to shikaayat to karenge rasoolallah SAWS, meri qaum iss Quran se hijrat karli thee, permanently chhod dee thee. To hamari koshish yeh hai ke hum Quran per waapas aajaaen, allah taala se ek hi dua hai ke ya allah hum ko Quran per waapas laa dee jiye,
Ameen ya Rabbul Alameen