Tafseer Surah al-Quraish Part 2

Bismillah Alhamdulillah was salaatu was salaamu ala rasoolillah

Rabbish sharah li sadri wa yassirli amri wahlul uqdatam min lisaani wa yafqahu qauli

As Salaamu Alaikum wa Rahmatullahi wa Barakatuh

Pichle hafte hum Surah Al-Quraish ki tafseer ka pehla hissa sunn rahe the, aur aaj In Sha Allah Surah Quraish ko aagay samajhne ki koshish karenge, aur aaj Surah Quraish Khatam ho jayega;

Ancient Civilizations (Qadeem Tehzeeb aur Tamaddun) Kya hain?

Surah Quraish me humne Quraish ki history jaani, aur ye history Yemen ki history se iss ka taaloq hai. Yemen ki history, uss waqt se hai, jab se human civilization ya human history hum ko pata hai, tab se Yemen ka zikr milta hai. Jaisa ke hum ko pata hai ke, insaani tareeq ya human history 4,500 se 5,000 saal puraani hai, ye hum recorded history ki baat kar rahe hain, warna to archeological findings ke zariye jo details milti hain wo shayed aur bhi purani hai.

To jo qadeem tareen human civilizations hain, unn me;

• Cheen hai – Chinese Civilization – iss me saboot hai ke 6,500 saal qabl-e-masih me chawal ki paidawar huwa karti thi, aur ek gaon (village) discover huwa jo 4,500 BC me china me tha. Writing ya tehreer, 1,600 BC me shuru huwi.
• Phir Hind hai – Indus Valley Civilization – Times of India ki 2016 ki news ke mutabaq 7,000 BC ki hai, Harappa aur Mohenjo Daro aur kayee aise qadeem sites iss ka saboot hain.
• Ussi zamane ke aaspaas tehzeeb hum ko misr me milti hai, yani Eqyptian civilization, pehle ye sab se purana civilization mana jaata raha hai. 5000 BC ke aas paas bataya jaata hai.
• Ussi zamane se Chaldean (Kaldian) Empire hai, 2500BC – ye babylon ke rulers the, south Mesopotamia se inn ka taaloq tha. Aaj ke zamane me Iraq me aata hai.
• Yemen ki tehzeeb bhi ussi zamane se hai, 2500BC se iss ka silsila shuru ho jaata hai, aur inn ka jo urooj ka period hai wo Saltanat-e-Saba ka period hai, jiss ka zikr Quran me – Surah Saba me aya hai aur Surah an-Naml me bhi aya hai, Malekah-e-Bilquis jo Sulaiman (عَلَيْهِ ٱلسَّلَام) ke haath par imaan la kar, phir riwayat se pata chalta hai ke wo Sulaiman (عَلَيْهِ ٱلسَّلَام) ke haram me dakhil huwi, wallahu Alam.
• To ye saltanat-e-saba bhi issi Yemen ke ilaaqe ki saltanat thi. Moarriqeen ya Historians kaafi tafseel bayan karte hain ke inn ke urooj ki ya in ki khushhaali ki buniyad ke do wujoohaat hain;
  • Ek to zira’at ya cultivation ki wajah se, jis ke liye ek bohot hi bada dam banaya tha. Marib Dam, duniya ka sab se pehla Dam, Yemen me tha.
  • Aur doosri thi tijarat – trade, jo Yemen se nikal kar, Bilad-ash-Shaam tak jaati thi, aur ye tijarat uss East – West Trade ka hissa tha, jo duniya bhar me chala aa raha tha.

Ancient Trade Routes (Qadeem Tijarati Raaste) Kya hain?

Pichle session me hum iss ka mukhtasar zikr kare the, ab yahan detail aa rahi hai. To uss zamane me kaun se trade routes the;

• Duniya me tijarat ya trade, hazaron saal se chala aa raha hai, latest research ke mutabiq, 10,000 saal qabl-e-masih se silsila shuru hota hai Africa aur Egypt, aur iss ke aas-paas ke ilaakhon me.
• Log ek doosre se saman exchange karte aa rahe hain, bartar system ke zariye, aur ye taqreeban 6000 BC bataya jaata hai, Mesopotamia me, aur Egypt me
• Spice route bhi hai, ye Indian Subcontinent aur Southeast Asia se Egypt, Middle East aur Europe tak pahunchta hai, 1500BC me Indonesia ke sailors, Sri Lanka, India aur China tak pahunch gaye the, apne spices ki tijarat karte huwe.
• Incense Trade Route – ye incense kya hai? Yahan Arab me bakhour kahenge ya India me agarbatti, kayee cheezen iss me shamil hain, jiss ko jalaya jaata hai khushboo ke liye. Iss cheez ki trading ya tijarat shuru huwi, taqreeban 700 saal qabl-e-masih, ya 700BC se shuru huwa. Iss route me land routes bhi hain aur sea routes bhi hain, aur ye saman Mediterranean region se lekar Arabian Peninsula se India tak tha. Aur inn raaston ke zariye, spices, Incense, aur kheemti cheezon ki tijarat hoti thi.
• Silk Routes bhi issi tarah China aur Far East ko Middle East aur Europe to connect karti thi, ye silk ki tijarat 130BC me shuru huwi. Silk route ka naam to baad me pada, lekin inn raaston se, na sirf silk balke;
  • Ghode jo central asia me log istemaal karte the, wo bhi china ko aur doosre ilaakhon me issi silk route se beche jaane lage,
  • Jab paper invent huwa china me, to wo bhi transport hone laga, unn ilaakhon me jahan log istemaal karne lage, initially to ye ek luxury ka hissa tha, lekin waqt ke saath ye common ho gaya,
  • Inn tijarati raaston ki wajah se na sirf saman, balke ideas, aur khaas taur par religion phailna shuru huwa, Buddhism, Zorostrianism, waghairah iss tarah phaile,
  • Jade ek qeemti pathar hai, wo Iran aur Central Asia ke ilaakhon me paya jaata hai, jise China becha jaane laga, 200BC ke aas-paas,
  • Spices, Fur, Glassware, Slaves, ye sab kuch inn raaston se tijarat hota tha.
• Iss se ye pata chalta hai ke, Allah (سُبْحَانَهُ وَتَعَالَى) har jagah har cheez nahi banayee, aur iss ke nateeje me, logon ki zarooriyat ko ek doosre par dependant banaya, aur iss ke wajah se tijarat shuru huwi aur issi wajah se mulkon ki economy aagay badhi.
• Issi tarah;
  • Ambar Route bhi hai, ye ek qism ka pathar ya plant extract hai, jis ki demand ki wajah se precious stone ki tarah tijarat hota raha hai,
  • Salt Route bhi hai, Namak aaj ki tarah har jagah banaya nahi jaata tha, natural jo namak sea shores par banta tha, wohi istemaal hota tha,
  • Tin Route bhi hai.

Dr. Israr Ahmed kehte hain ke, Iss waqt jo humara duniya ka tasawwur hai, uss me America bhi hai, Australia bhi hai – aur Arctic aur Antartic continents hain. Warna qadeem zamane me sirf teen continents ka pata tha, Asia, Europe aur Africa. Uss duniya ka center tha ye Jazeerah-e-Arab, ye Arabian Peninsula. Ab middle east ke naam se jana jaata hai, to ye ek central position me hone ki wajah se jo West ki tijarat thi ya Europe ko jo maal jaata tha, Far East se shuru hote the trade routes aur pahunchte the Europe.

To ab asaan ek tareeqa ban gaya tha ke, sea routes ke zariye China, Southeast Asia, India ka saman aa kar Yemen ki Adan bandargaah ya Port of Adan par utarta tha, aur udhar Europe ka saman Shaam ke port par utarta tha, to ye jo East-West Trade hai wo bohot hi lambe arsay tak Qaum-e-Saba ke paas tha, sea routes ke zariye bhi ye tijarat karte the, aur Jazeera-e-Arab ke land route ke zariye bhi ye tijarat karte the, ye uss waqt ki baat hai jab ke Quraish ka koi naam-o-nishan bhi nahi tha.

Kayee jungein bhi ladi gayee, trade route ke kisi important shehr par qabza karne ke liye, iss ki kayee misalein tareekh me milti hain. Saltanat-e-Saba par hamla karke, Saltanat-e-Himyar me tabdeel ho gaya. Baihaqi ki ek Hadith me aap (صلى الله عليه وسلم) farmate hain ke, “Pehle Arabon ki hukumat Himyar ke haat me thi, phir Allah (سُبْحَانَهُ وَتَعَالَى) unn se wapas le li aur Quraish ko ata kar di” To ye bataya jaata hai ke, ye band ya dam tootne ki wajah se tabahi ayee, jiss ka zikr Quran me kiya gaya hai Surah Saba ki 16 ayat me ke;

“To unhone (Shukr Guzari se) Munh mod liya, pas hum ne unn par zordaar sailaab bhej diya aur unhein unn ke baaghon ke badle do aise baagh diye jin ke kadwe – kaseele phal, imli aur kuch bare ke darakht”

To iss ki wajah se wo tabah ho gaye, aur log wahan se nikal gaye aur mukhtalif shehron me jaa kar abaad ho gaye, ye rasoolullah (صلى الله عليه وسلم) ki waladat se 130 saal pehle ka waqiya hai. To ye Aus aur Khazraj ke qabile bhi Yemen se aa kar abaad huwe the, Madina me. Issi Tareeqe se North ke aur Iraq ke jo qabile the, wo bhi Yemen se ja kar wahan bass gaye the. Lekin ussi zamane me, taqreeban 400 eeswi me, Qusai bin Kilab ki paidaish ka saal hai, aur 450 eeswi me wo Quraish ke sardar the, unhone Bani Ismail ko jama kiya aur dawat di ke, Kaba ke atraaf me aa kar bass jao, aur phir aagay ka waqiya to hum pichle dars me sunn chuke hain, ke kaise Quraish ne Tijarat par control hasil kiya.

Rasoolullah (صلى الله عليه وسلم) se Pehle Duniya ka haal kya tha?

Quraish ki fazeelat aur domination ya urooj ke baare me bhi hum pichle dars me sunn chuke hain. Lekin yahan ye batana zaroori hai ke,

• Quraish ke urooj ki pehli wajah bhi Rasoolullah (صلى الله عليه وسلم) ka bheja jana hai, kyun ke nabi qaum ke unn tabkhon se aate hain jo logon me top class hote hain,
• Doosri baat yahan ye batana hai ke, aap (صلى الله عليه وسلم) ki ba’eesat ki, aap (صلى الله عليه وسلم) ke iss duniya me tashreef laane ki wajah, uss waqt ke halat hain, to aise kya halat the, jiss me aap (صلى الله عليه وسلم) tashreef laye?
• Iss se pehle hum sun chuke hain ke, Quran ki aakhri 10 suratein, Rasoolullah (صلى الله عليه وسلم) ki seerat se wabasta hain.
• Surah al-Feel, aap (صلى الله عليه وسلم) jiss saal paida huwe, uss saal ke waqiye ko bayan karti hai aur ye Surah Quraish, kyun ke, Surah al-Feel ka continuation hai, ye do suratein uss waqt ke halat bayan kar rahi hain. Aur khas taur se Surah Quraish ki aakhri ayat me Allah SWT bhook me khana khilaya aur khauf me aman diya kaha, iss ke baare me hum aagay dekhenge,
• Phir Surah al-Maun, me jo ghareebon aur yateemo ke saath bura treatment ho raha tha, uss ko bayan karti hain, to iss aitbaar se, hume ye pata chala ke – aakhir wo kaun se halaat the, jiss me Allah (سُبْحَانَهُ وَتَعَالَى) ne ye behtar samjha apne Nabi (صلى الله عليه وسلم) ko bhejna ke liye.
• Aap (صلى الله عليه وسلم) se pehle, duniya tareeki ke sab se nichle level par thi.
• Pichle Rasoolon ke laaye huwe, qawaneen log bhula diye the, ya todh-modh kar, nazar-andaz kar diye the, civilizations ya duniya ki tehzeebein decline ya zawal ki taraf ja rahi thi, aur insaaniyat darkness ya tareeki ke daur me doob chuki thi, aur kufr, zulm aur corruption har taraf phaila huwa tha,
• Aap (صلى الله عليه وسلم) ki paidaish ke waqt, zameen par do azeem taqatein maujood thi, ek mashriq ya east me – Persian Empire – ya saltanat-e-Faras thi aur maghrib ya west me – Roman Empire – ya Rumi Saltanat thi, aur ye do saltanatein ek doosre se mustaqil jung me masroof thi aur wo kamzor aur andar se khokli ho chuki thi, jung ki wajah se inn ke khazane khaali ho chuke the, lekin jung kiye ja rahe the,
• Inn jungon ke natije me, 1 million ke aap paas log maare gaye, aur iss ke contrast me hum pehle sunn chuke hain ke aap SAWS ki jungon ke nateeje me 23 saal ke arsay me sirf 500 log maare gaye, jo ke 2000 gunah zyada tha,
• Arabon ke halaat bhi kuch ache nahi the,
  • Wo aadaat aur jazbaat ke ghulam the, yalghaar aur loot par fakhr karte the,
  • Wo beti ke paida hone par uss ko zinda dafnaa dete the,
  • Aurat ko istemaal karne cheez samajhte the aur Auraton ke koi huqooq nahi the,
  • Bani Ismail shirk me mubtala ho gayee thi, apne haathon se, mithaaiyon se butth banaya karte the aur bhook lagne par unn butthon ko kha lete the, Kaba ko ek butth khana bana diya tha,
  • Qabaili dushmani, aur khoon-rezi Arab ki tapti reth ki tarah tezi se chal rahi thi,
  • Makkah ke log – sood khaya karte the, aur baaz waqt 100% interest rate hota tha, taakay lene wala – wapas ada na kar sake, aur jab wo ada nahi kar pata to uss ko ghulam bana lete the ya uss ki biwi aur beti ko ghalat kaamo ki taraf dhakel dete the, takay paise wasoole jayen,
  • Nange ho kar Tawaf kiya karte thei, aur samjhte ke ye ibadat ka bohot hi ooncha martaba hai, mann ghadat batein aur rituals par amal ho raha tha,
  • Israr Ahmed kehte hain ke, iss mahol me bhi, aise log Makkah me maujood the, jo kabhi bhi butthon ke saamne sar nahi jhukaye aur na unn ki ibadat ki, Zaid Ibn Amr, jo Umar (رَضِيَ ٱللَّٰهُ عَنْه) ki behen ke susar the, unhone Qasam kha li thi ke wo Deen-e-Ibrahim ki itteba karenge,
  • Lekin deen-e-Ibrahim khatam ho gaya tha, bhula diya gaya tha, wo safar karte aur yahoodi aur nasraani paadriyon se milte aur Ibrahim AS ke deen-e-haneef ke baare me logon se poochhte,
  • Ek Paadri ne unhe bataya ke Ibrahim AS ka deen to khatam ho chuka hai lekin, ek Nabi aane wale hain,
  • Israr Ahmed kehte hain ke, Zaid Bin Amr itne bechain the, ke wo kaba ka ghilaaf pakad kar Allah se dua karte ke, Aye Allah – tu ek hai, main teri hi ibadat karna chahta hoon, lekin nahi maloom ke kaise karoon?
• Saltanat-e-faras me, man-maani chal rahi thi, apni marzi se naye deen aur qawaneen bana lete the, aur Auraton ko tamam mardon ki mushtarika – shared property ka darja de diya tha. Ghareebon par bhari taxes laga kar rayees log maze kar rahe the,
• Rumiyon ke yahan, Isa (عَلَيْهِ ٱلسَّلَام) ki taleemat par chalne ka dawa to karte the, lekin Allah ki wahdaniyat me milawat kar dali thi aur Greek yani Unani tasawwuraat se muatassir ho kar – Isa (عَلَيْهِ ٱلسَّلَام) ko Allah ka beta bana liya tha,
• Yahoodi ki aabadiyan, west Asia aur north Africa me phaili huwi thi, aur inn ke paas kayee nabi aaye lekin – yahoodiyon ki islaah na kar sake, Musa (عَلَيْهِ ٱلسَّلَام) ke laaye huwe qanoon – Taurait ko badal dala tha,
• China me, Confuscious cheeniyon ko confuse kar diya tha, aur positive thinking se wo mehroom the,
• India me, alag-alag ilaakhon me alag-alag mamlekatein thi, aur har mamlekat ka apna khuda tha,
• To duniya bhar me, jungein, khoon-rezi, ghulami, auraton par zulm, har jagah mazloomon par zulm, haq ko taqat se kuchal diya jata tha, duniya sakht museebat me thi, lekin koi bhi unn andheron se nikaalne ke qabil nahi tha, ek frustration wali situation ho gayee thi, saari duniya me,
• Inhi sab cheezon se duniya ko bachane ke liye – Muahmmadur Rasoolullah (صلى الله عليه وسلم) ko bheja gaya,
• Medical science ke hisaab se – insaani dimagh ab itna develop ho gaya tha ke, ab uss me itni sakat thi ke wo Quran ko samajhne aur uss ke message ko le kar aagay badhne ke qabil ho gaya the,
  • Matlab, Insaan ka dimagh dheere dheere develop huwa, Adam AS ki shariyat ka ek hi point tha, iss darakht ke paas nahi jana aur iss ka phal nahi khana,
  • Allah ka hukum maanne ki bhi training huwi, insaan ke dimagh dheere dheere train kiya gaya, wo sirf Allah (سُبْحَانَهُ وَتَعَالَى) hi train kar sakta the,
  • Phir jab iss duniya me bheje gaye, Adam aur Hawwa (عَلَيْهِم ٱلسَّلَام) ki family badhne lagi, to uss badhti family ke liye rules and regulations Allah (سُبْحَانَهُ وَتَعَالَى) bheje,
  • Phir jaise jaise insaaniyat badhti gayee aur phailti gayee, aur mushkilaat ka saamna huwa, waise waise Allah (سُبْحَانَهُ وَتَعَالَى) apne paighambaron aur nabiyon ke zariye insaano ki hidayat ki,
  • Insaan ka dimagh iss qabil ho gaya tha ke, wo ab phalsaphay likhne laga, apni philosophy – Plato, Aristotle, Socrates, Confucius, Lao Tzu, ye sab ghaur-o-fikr ke zariye philosophy likhe, ek idea pesh kiya insaaniyat ke saamne, ke duniya kaisi hai, aur insaan ko kya karna chahiye
  • Ye tamam naam Quran ke aane se pehle ke logon ke naam hain, iss aitebaar se insaani dimagh ab uss level par pahunch gaya tha ke, Quran ka level samajh sake, aur uss ke ahkamaat par amal kar sake,
• Allah SWT ne Muhammadur Rasoolullah SAWS ke zariye aisa kalam insaano ko ata kiya, jo taa qayamat rehne wala kalam hai, aur iss ke challenges ko koi poora nahi kar paya – aaj tak.

Quraish ke kuffar ka downfall – Rasoolullah (صلى الله عليه وسلم) ki ba-ithat ke baad

Allah (سُبْحَانَهُ وَتَعَالَى) ne Quraish ko Arab ka sardar banaya, aur uss me se, aap (صلى الله عليه وسلم) ko pasand farmaya. Rasoolullah (صلى الله عليه وسلم) ke nabi banaye jaane ke baad, aap ne dawat di, aur seerat ka aksar-o-beshtar hissa hum pichle 8 Suraton me sunn chuke hain. To jo kuffar-e-Quraish the, unn ke paas do raaste the,

• Ek ye ke wo Islam Qabool kar lein, aur
• Doosra ye ke wo Rasoolullah (صلى الله عليه وسلم) ki mukhalifat kare,
• Unhone aap (صلى الله عليه وسلم) ki mukhalifat karna pasand kiya aur uss ke nateeje me jo peace, security aur unn ke khafilon ki hifazat unhein Allah (سُبْحَانَهُ وَتَعَالَى) ki taraf se hasil thi, wo wapas le li gayee,
• Jab tak aap (صلى الله عليه وسلم) Makkah me the, Quraish aap (صلى الله عليه وسلم) ko takleef to diye, lekin jaan se maarne me na kaam rahe,
• Jo Musalmaan kamzor the, Quraish se bach kar jab wo Abysinia – Habasha chale gaye, to Quraish apne jo trade ties the ya trade contracts the, unn ka istemaal karke, Musalmano ko aur Islam ko nukhsan pahunchana chaha, lekin unn ki ye koshish ko Allah (سُبْحَانَهُ وَتَعَالَى) ne nakaam kar diya.
• Phir jab aap (صلى الله عليه وسلم), Madina tashreef le aaye, phir Quraish ke khafilon ko jo hifazat hasil thi, wo khatam kar di gayee, aap (صلى الله عليه وسلم) ko unn khalifon par Allah (سُبْحَانَهُ وَتَعَالَى) ne control de diya,
• Pehli Jung huwi Badar me aur Quraish ke sardaron ki aksariyat maari gayee, jungon ka silsila chalta raha aur aakhir me fatah Makkah ke zariye – Allah ke deen ki Fatah huwi, jiss ko hum sunn chuke hain.
• Aur iss Fatah ke zariye, phir se Quraish ko jo ab Islam qabool kar chuke the, unn ko saari duniya – alteast the known world par Fatah de di, Khalifa inhi me se ayenge kaha.
• Rasoolullah SAWS ke zariye ek aisa revolution aya ke, 23 saal me poore arab ki sar-zameen par phail gaya, aur Harzat Umar RA ki daur-e-khilafat me 22 lakh sq miles jo 3 continents par phaila huwa tha.
• Fatah Makkah ki ahmiyat ye hai ke, sirf aur sirf 23 saal ke arsay me, ye deen logon ke dilon par raaj karne laga, Fatah Makkah me logon ke gharon me ghuss kar nahi mara gaya, balke unn ke dilon ko jeet liya gaya.
• Aur iss ke liye Aap SAWS ne insaani jaano ki jo qeemat ada ki, wo kul mila kar, 500 ke aas paas thi, to pata chala ke, Islam qatl-o-gharat phailane nahi, balke logon ko aman aur chain ata karne ke liye, Allah SWT ne bheja.

Hume Kya Karna Chahiye?

Pehla – Silsila-e-Nasab, CAA, NRC

• Silsila-e-nasab ko Quraish bohot ahmiyat dete the, Hajj ke dauraan wo arkaan-e-hajj me apne baap dada ki badai kiya karte the,
• Hajjat-ul-wada me, aap (صلى الله عليه وسلم) ne bata diya ke – wo tamaam fazeelatein jo ahd-e-jahiliyat me bayan ki jaati thi, wo aaj mere khadmo ke neeche hai,
• silsila-e-nasab ya lineage ki ahmiyat sirf iss liye hai ke, hum sila-rahmi kar sake,
• To aaj jo mushkilaat ka saamna India ke Musalmaan kar rahe hain, uss ka solution bhi yehi hai, ke apne-apne khandano ka silsila-e-nasab banao, ek doosre se sila-rahmi karo, In sha Allah – CAA aur NRC hamara kuch nahi bigaadh sakega,

Doosra – Kaam jo Hume karna chahiye – Aap (صلى الله عليه وسلم) ki family ka khayal

• Aap (صلى الله عليه وسلم) ka silsila-e-nasab ke baare me hum ne suna aur agar hum apna silsila-e-nasab banayenge, to unn logon ka khayal bhi rakh sakte hain, jiss ki takeed Rasoolullah (صلى الله عليه وسلم) ne ki thi,
• Ye hadith, jiss ko Hadith-e-Khumm bhi kaha jata hai, Sahih Muslim me hai ke, aap (صلى الله عليه وسلم) ne farmaya, ke main tum me do bhaari cheezen, chhorrhe ja raha hoon.
  • Ek hai Allah ki Kitab, Quran, jiss me hidayat hai aur noor hai, iss ko mazbooti ke saath thaame raho, aur iss ko follow karo, aur
  • Doosre hain, mere ghar waale, ahl-e-bait, main tum ko unn ke saath hamdardi karne ki taakeed karta hoon, aur afsos hai ke hum iss fareeze ko bhool gaye,
  • poocha gaya ke, aap (صلى الله عليه وسلم) ki azwaaj aap ke ghar wale hain? To kaha gaya, ke azwaj to hain, lekin yahan unn ghar walon ka zikr ho raha hai, jiss par zakat dena mana hai, Haram hai,
  • Poocha gaya ke, ye kaun hain? Kaha gaya ke, Ali (رَضِيَ ٱللَّٰهُ عَنْه) aur unn ki aulad,
  • Aqil (رَضِيَ ٱللَّٰهُ عَنْه) aur unn ki aulad,
  • Jafar (رَضِيَ ٱللَّٰهُ عَنْه) aur unn ki aulad,
  • Abbas (رَضِيَ ٱللَّٰهُ عَنْه) aur unn ki aulad.
• Iss hadith ko madd-e-nazar rakhte huwe, hume kya karna chahiye, kayee log sawal karte hain ke, Syedon ko zakat dena ya nahi?
• To hume ye karna hai ke, inn ka khayal rakhna hai, phir silsila-e-nasab se hi pata chalega ke, waqay hi, jo claim karte hain ke, wo syed hain, unn ka nasab, aap (صلى الله عليه وسلم) ke ghar walon tak pahunch raha hai ya nahi, agar hai to inn ko zakat nahi di ja sakti aur inn ka khayal rakhna hai, jaisa ke aap (صلى الله عليه وسلم) ne takeed ki.
• Agar aise logon ka khayal rakhte huwe, hamare paas paise nahi bach rahe hain, saving nahi ho rahi hai, to koi baat nahi. Kal Qayamat ke din, Nabi ko munh dikhaane ke qabil to rahenge, warna kaise hoga?

Teesre – Ashaab-e-Suffah jaise logon ka khayal karna hai

• Pichle dars me humne suna ke, aap (صلى الله عليه وسلم) Ashaab-e-Suffah ka khayal rakhte the, unn ke khaane, peene ka khayal rakhte the,
• Iss sunnat ko zinda karna hai, jo kamzor, mazloom, miskeen log hain, unn ka khayal rakhe

Conclusion

• Musalmano aur uss se aagay badhkar insaniyat ko jo karna hai, wo Tijarat se related hai, Allah (سُبْحَانَهُ وَتَعَالَى) ne har cheez duniya me har jagah nahi banayee, balke ek doosre se dependant banaya hai,
• Allah SWT ne Quraish ko tijarat ya trade sikhaya aur inn ko trade ki aur contracts ki samajh di
• To Quraish trade ke contracts banaya karte the,
• Safar sikhaya gaya, aur paani waghairah ke muqamaat ka ilm diya, to ye asaniya Quraish ko ata ki, jiss se safar unn ka asan ho gaya,
• Inn ko samajh di, ke kaunsi cheez kahan bechna hai, product understanding di,
• Ye jo trading karte the, uss me spices, incense, silk waghairah le ja kar Syria me bechte the, aur Europe ka saman, kheemti pathar, fur, kapde waghairah la kar Yemen me bechte the,
• Measurement ki knowledge di unn ko, kyun ke, har jagah ke naap alag alag the,
• Ye tamam cheezen Allah ne ata ki, to inn inaamaat ke natije me Quraish ko chahiye tha ke wo ek Allah ki ibadat karte. Lekin uss ki jagah wo inamaat ko Allah SWT ke deen ki mukhalifat me istemaal karne lage,
• Ab ye to Quraish ke baare me Surah tha, aur iss ko hume kyun sunaya ja raha hai?
• Aaj ke daur me Quraish ek idea aur space occupy kar rahe hain.
• Agar aise inaamat kisi mulk, qaum ya fard ya individual par hain Allah SWT ke, to unhe bhi chahiye ke Allah ka shukr guzar bane aur Allah ke inn inamaat ko uss ki ita’at me istemaal kare na ke Allah ki nafarmaani ke liye,
• Aaj international trade ko khatam karne ki koshish ho rahi hai, Nationalism ka agenda la kar,
• Aaj Sri Lanka, aur deegar mumalik economic crisis se guzar rahe hain, aur ek report ke hisab se 17 aur mumalik iss current economic crisis ka shikar hone wale hain,
• To ye Quraish ke Idea aur space ko jo Mumalik occupy kar rahe hain – wo Allah ke favors ko maan le, aur inn inaamaat ko Ghareebon, miskeeno aur zaroorat mando ke liye istemaal kare, aur
• Quraish ke ghalat harkaat se bachna chahiye, wo ghalat idea aur space ko chhorrh deina chahiye