Tafseer Surah Al Feel – Part 1

Bismillah Alhamdulillah was salaatu was salaamu ala rasoolillah

Rabbish sharah li sadri wa yassirli amri wahlul uqdatam min lisaani wa yafqahu qauli

As Salaamu Alaikum wa Rahmatullahi wa Barakatuh

Pichle do hafton se hum Surah Quraish ki tafseer sunn rahe the, aur aaj In Sha Allah Suratul Feel ko samajhne ki koshish karenge, ye Surah me bhi samjhane ka bohot hai, to 2-3 session to lagenge.

Introduction

Surah Al Feel – Quran ki 105wi surat hai, lafz e Al Feel iss surat ki pehli ayat me aya hai. Aam taur par iss ko Surah Alam Tara bhi kaha jaata hai.^{^[1]}

Ab yahan structure of the quran ki rooh se, Raymond Farrin apni kitab Structure and Quranic Interpretation me likhte hain, 4 suraton ke set me, pehle jode ki pehli surat hai, ye Surah al-Feel.

Surah ka pas-manzar aur maqsad (Background of Surah and its Purpose)

Mufti Shafi Sahab, Maariful Quran me iss Surat ke introduction me likhte hain ke, ye Surah Haathi walon ka zikr kar raha hai, jo Yemen se Makkah aye the, Kaba ko todhne, tabah karne ke liye, destroy karne aye the.^{^[2]}

Haathi walon ka waqiya uss saal huwa, jiss saal Muhammadur Rasoolullah (صلى الله عليه وسلم) iss duniya me Tashreef Laaye, ye lag-bagh 570 ya 571 eeswi ka waqiya hai.^{^[3]} Ye tareekh yaqeen ke taur par nahi keh sakte, kyun ke aap (صلى الله عليه وسلم) ki paidaish ke saal par kisi ne ahmiyat nahi di. Kisi ko nahi maloom tha ke ye 40 saal baadh nabi banenge. Jab nabi bann gaye to phir log yaad karne lage ke kya waqiyaat the, jin se kuch purani cheeze yaad aa jaye aur relate kar sake.

Ye waqiya ek maujeza tha, aisa Muhadditheen maante hain, lekin ab agar definition ke lehaz se dekha jaye to, maujeza to Allah ki taraf se Nabiyon aur Rasoolon ko diya jaata hai, apni nubuwwat ke saboot me. Lekin, kyun ke, ye waqiya aap (صلى الله عليه وسلم) ki paidaish ke saal aap ki paidaish se pehle huwa, Muhadditheen ke nazdeek iss ko irhaas kaha jaata hai, aisi cheez jo Nabi ya Rasool ke aane se pehle ho ya Nabi banne se pehle namoodar hon. Aise kayee waqiyaat aap (صلى الله عليه وسلم) ke Nabi banaye jaane se pehle saamne aaye aur Haathi walon ka waqiya uss me se ek hai.^{^[4]} Iss ke baare me hum aagay detail me baat karenge.

Maulana Maudoodi Tafheem-ul-Quran me Yemen ki history ke baare me, Surah Burooj ki 7wi ayat ki tafseer me likhte Hain ke, Tuban Asad Abu Karib, jo ke Himyar ka badeshah tha (Yemen ki Himyar Saltanat) me, wo ek waqt Yathrib aya aur wahan yahoodiyon se muta’ssir ho kar Judaism ya yahoodiyat qabool kar liya aur jab Yemen wapas aya to, Banu Qureza ke do yahoodi ulama bhi saath le aaya aur wahan yahoodiyat ki tableegh shuru ki. Tuban ki maut ke baad, Dhu-Nuwas Yemen ka badeshah bana aur wo Najran par hamla kiya, jo ke nasraani aksariyat yani Christian majority wala shehr tha, taakay log Isaaiyat ko chhorrh kar yahoodiyat qabool kar lein. Ibn Hisham apni Seerat me likhte hain ke, Najran ke Isaayi, Isa (عَلَيْهِ ٱلسَّلَام) ki asli Bible ki itteba karne waale the.^{^[5]}

Jab Najran ke Isaaiyon ne yahoodiyat qabool nahi ki, Dhu-Nuwas ne wahan ke Isaaiyon ki kaseer tedaad ko bade-bade aag ke gadon me jala dala aur kayee logon ka talwaar se qatl kiya - taqreeban 20,000 log maare gaye. Ek Najrani wahan se farar hone me kamiyaab ho jaata hai, aur ek riwayat ke mutabiq wo Rumi Badeshah Qaisar ke paas jata hai, aur doosri riwayat ke mutabiq wo Habasha ke Badeshah an-Najjashi ke paas jata hai, aur unn ko Najran ke waqiye ki khabar deta hai. Pehli riwayat ke mutabiq, Qaiser an-Najjashi ko khat likhta hai, aur doosri riwayat ke mutabiq, an-Najjashi Qaiser se madad maangta hai - Navy se madad karne ke liye. Abyssinia ya Habasha ki fauj, jiss me 70,000 fauji the, Aryat ki sarbarahi me Yemen par hamla karti hai, jiss me Dhu Nuwas mara jata hai aur Yemen ki yahoodi hukumat khatam ho jaati hai aur ab Yemen, Habesha ki Isaayi hukumat ka hissa ban jata hai.^{^[6]}

Ab yahan difference of opinion ye hai ke, Ibn Kathir ke mutabiq an-Najjashi ki fauj ke do Commander the, Aryat aur Abraha.^{^[7]} Aur Ibn Ishaq apni Seerat me likhte hain ke, Aryat fauj ka commander tha aur Abraha - Fauj ka hissa tha. Beher-haal dono me an-ban ho jaati hai aur Aryat ka qatl ho jata hai. Abraha Yemen ko apne control me kar leta hai aur wo an-Najjashi to keh kar, Yemen ka Governor ban jata hai.^{^[8]}

Yemen par qabze ke baad, Abraha, Najran me ek Church banata hai, iss maqsad se ke Yemeni log hajj ke liye wahan jaya kare, Kaba ko jaane ke bajaye. Wo church itna ooncha tha, ke koi uss ke qareeb khada ho to uss church ke ooperi hisse ko nahi dekh sakta tha. Uss church ko sone, chandi aur qeemti jawaheraat se sajaya gaya tha. Taakay log iss church ki taraf attract hon, log hairat me parrh jaye aur Kaba ki jagah iss ghar ko abaad kare. Issi liye uss ne ye ailan kiya ke koi bhi Makkah ki Masjid-e-Haram nahi jayega aur hajj yahan Yemen me hoga.^{^[9]}

Maulana Maudoodi likhte hain ke;

● shuru se hi ye samajh lena chahiye, ke ye church kisi mazhabi josh ki wajah se nahi banaya gaya tha, balke

● Iss ke piche economic aur political reasons bhi the,…, aur yehi asli wajah thi, na ke Isaayi bhaiyon ke khoon ka badla lena.

● Ab pichle dars me hum sunn chuke hain iss ilaakhe ki history aur tijarati raste aur unn ki history,

● Rumi hukumran ye nahi chahte the ke, Arab ke taajiron ko faida mile, kisi bhi cheez ka rate kum karna ke liye middle-men ko nikaalna padhta hai.

● Arab taajir wo middle-men ka kaam kar rahe the, to jab se Rumiyon ne Egypt aur Syria par qabza kiya, tab se hi ye alternate trade route ki talash me the, taakay ye East-West Trade ko control kar sake, aur zyada se zyada munafa kama sakay.

● Iss se 500 saal pehle bhi, Qaisar Augustus ne ek badi fauj bhej kar Arab par qabza karna chaha tha, lekin wo hamla na-kaam sabit huwa, uss ke baad, Rumiyon ne samandar ke zariye doosre raaste talash kar liye, Red Sea ke zariye, aur

● Yemen ke paas sirf land route reh gaya, jo ab wo Habasha ki fauj ke zariye, Yemen par qabza karne me kamiyaab ho gaye.^{^[10]}

Yemen me aman ke baad, Abraha ab apni tawajjoh apne maqsad ki taraf ki, jo shuru se Rumiyon aur Unn ke Habasha ke allies ki thi;

● Pehla maqsad, Isaaiyat ko phailana, aur

● Doosra maqsad, Arabon ke tijarati raaste par qabza karna

● Ye doosra maqsad, bohot zaroori ho gaya tha, kyun ke, Rumiyon ki mustaqil jung Saltanate-e-Faras se jo chal rahi thi, uss ki wajah se tamam tijarati raaste band ho gaye the.

● Issi maqsad ko poora karne ke liye, Abraha ne church banaya.^{^[11]}

Ibn Ishaq ke mutabiq, Abraha ne an-Najjashi ko khat likha aur khabar di ke, “Main aram nahi karoonga, jab tak ke, Arab hajiyon ko iss church ki taraf na kar loon”. Ibn Kathir likhte hain ke, Abraha ne khule aam ailaan karwaya Yemen me ke, “iss saal hajj ke liye iss church ko aana”. Wo asal me Arabon ko aisa kaam karne par uksaana chahta tha, jo usse Makkah par hamla karne aur Kaba ko tabah karne ka bahana faraham kare. Ibn Ishaq kehte hain ke, ye ailan sunn kar ek Arabi shaks ne uss church me jaa kar usse na-paak kar diya. Ibn Kathir kehte hain ke, ye kaam Quraish ke ek shaks ne kiya aur Muqatil kehte hain ke, Quraish ke kuch naujawano ne church ko aag lagaayi, uss raat hawa tez thi aur church ko bhari nukhsan huwa. Asliyat kuch bhi rahi ho, Abraha ko bahana mil gaya Kaba ko tabah karne ka, aur apne dono maqasid ko poora karne, Quraish ko tabah karke tijarati raaston par qabza aur Arabon ko dara kar Isaaiyat ko phailana.^{^[12]}

So, 570 ya 571 eeswi me, Abraha 60,000 faujiyon ka lashkar le kar Makkah ki taraf rawana huwa, jiss me 13 haathi the, aur ek riwayat ke mutabiq 9 haathi the. Iss me ek haathi tha, jiss ka naam Mahmood tha, jo khaas taur par bada aur taqatwar tha, ye haathiyon ki madad se Kaba ko khatam kar dena chahte the. Raaste me, sab se pehle ek Yemeni Sardaar, Dhu Nafr ne, Arabon ki ek fauj jama karke, iss lashkar ko rokne ki koshish ki, Arabon ne badh-chadh kar iss me hissa liya, kyun ke, wo samajhte the ke, ye unn ki akhlaaqi zimmadari hai ke wo Allah ke uss muqaddas ghar ko defend kare, lekin wo haar gaye aur Dhu Nafr ko qaidi bana liya gaya.^{^[13]}

Abraha ka lashkar aagay badha aur jab wo Banu Khath’am qabile ke paas pahunche, to unn ke sardar Nufail Ibn Habib ne, apne poore qabile ko saath le kar, Abraha ke lashkar se takraya, lekin ye bhi haara diye gaye aur Nufail ko qaidi bana liya gaya. Abraha pehle to Nufail ko qatl kar dena chahta tha, lekin uss ko ek guide ki tarah rakh liya, Arab ki sar-zameen me, Hijaz ka raasta batane ke liye.^{^[14]}

Jab Abraha ka lashkar Ta’if pahuncha, Bani Thaqif ko gumaan tha ke, wo itne bade lashkar ko rok nahi payenge, aur kahin ye lashkar al-Laat ki mandir ko na tabah kar de, wo Abraha se milte hain aur kehte hain ke, tum hamare mandir ko to todhne nahi aaye ho, tumhara maqsad to Kaba ko tabah karna hai, jo Makkah me hai, aur wo raazi ho jaate hain ek shaks ko saath dene aur raasta batane. Abraha iss tajweez ko maan leta hai, aur Bani Thaqif Abu Righal ko guide ki haisiyat se Abraha ke saath bhejte hain. Jab wo Makkah ke qareeb, taqreeban 3 meel ke faasle par, al-Mughammas ke muqam par pahunche to Abu Righal ka inteqaal ho jaata hai. Arab log Abu Righal ki qabar par pathar maarte hain, aur ye practice aaj ke din tak chali aa rahi hai aur wo Bani Thaqif par bhi lanat bhejte hain, jinhone apni mandir ko bachane ke liye, Allah ke ghar ko tabah karne walon ka saath diya.^{^[15]}

Ibn Ishaq likhte hain ke, Abraha ne apni fauj ka dera al-Mughammas me daala, aur yahan Quraish aur doosre qabilon ke jaanwar charne ke liye aya karte the, Abraha ne apne sipahiyon ko bheja, jo charne wale janwar aur oontt pakad laane ke liye, aur wo uss muhim me kaamiyaab huwe. Kayee jaanwar sipayee le aaye, jiss me Rasoolullah (صلى الله عليه وسلم) ke dada aur Quraish ke sardar Abdul Muttalib ke 200 oontt the. Abraha ne ek shaks Hanaatah al-Himyari ko Makkah bheja, taakay wo Quraish ke leader ko le aaye aur unhe bataye ke, Abraha unn se jung karne nahi aya, agar wo uss ke lashkar aur Kaba ke beech me na aye to. Hanaatah jab Makkah pahuncha to wo Abdul Muttalib ke paas le jaya gaya, aur wo Abraha ka paigham Abdul Muttalib ko deta hai. Abdul Muttalib jawab me kehte hain ke, Allah ki qasam, na hum iss qabil hain ke uss lashkar ka muqabalah kar sakay aur na uss Muqaddas ghar ka difa kar sakte hain. Ye to Allah ka ghar hai, jisse uss ke dost Ibrahim (عَلَيْهِ ٱلسَّلَام) ne banaya hai, agar uss ki marzi huwi to wo iss ghar ka difa khud karega, Allah hi Kaba ko defend karega. Hanaata - Abdul Muttalib ko Abraha ke paas aane ki dawat deta hai, aur wo uss ke saath Abraha se milne jaate hain.^{^[16]}

Jab Abraha - Abdul Muttalib ko dekhta hai, to wo unn se bohot mutassir ho jaata hai, kyun ke, Abdul Muttalib intehaayi khoobsurat, dilkash aur attractive personality ke malik the, Abraha apne takht se, apne throne se uttar kar, Abdul Muttalib ke saath neeche carpet par baitth jaata hai. Aur apne translator se kehta hai, inn se poocho inhe kya chahiye? Abdul Muttalib ne jawab diya ke, “Main chahta hoon ke badeshah (Abraha) mujhe mere 200 oontt wapas kar dein, jo sipahiyon ne mujh se le liya”. Abraha ne apne translator se kehta hai, ye jawab dene ke, “Jab maine tumhe pehli baar dekha, to aap ke liye mere dil me ehteraam tha, jo ab khatam ho chuka hai, kyun ke, aap apne 200 oontton ke baare me fikr mand hain, jab ke aap ko pata hai ke, main Kaba ko tabah karne ke liye aya hoon, jo tumhare aur tumhare abaa aur ajdaad ke deen ka mujassama hai, uss muqaddas ghar ke baare me tumne kuch nahi kaha, taakay main uss ko chhorrh doon.” Abdul Muttalib ne intehayi sukoon se jawab diya ke, “Main apne oontton ka maalik hoon, issi liye main unn ke liye fikr mand hoon. Aur main uss Allah ke ghar ka maalik nahi, uss azeem ghar ke maalik ko pata hai uss ke ghar ki kaise hifazat karna hai”. Abraha ne kaha ke, “Tumhara khuda uss ghar ko mujh se nahi bacha sakta” Abdul Muttalib ne kaha ke, “Tum jo chaaho so karo, ya koshish karke dekh lo”.^{^[17]}

Ek aur riwayaat ke mutabiq, Quraish ke aur sardaar bhi Abdul Muttalib ke saath the, unhone Abraha ko ye salah di ke, agar wo Kaba ko nukhsaan pahunchaye baghair chala jaye to wo, usse Tihama ki paidawaar ka ek tihayee hissa salana kharaaj-e-tehseen, tribute ada karenge. Lekin Abraha ne ye proposal ko nahi mana. Abdul Muttalib apne oontt le kar Makkah wapas ho gaye, aur Quraish ko hukum diya ke, wo Makkah chhorrh kar qareebi pahadiyon par chadh jaye. Unhe khauf tha ke, Abraha ki fauj unn par zulm karegi. Phir Abdul Muttalib apne sardar sathiyon ke saath, Kaba ke darwaze ka konda pakad kar Allah (سُبْحَانَهُ وَتَعَالَى) se dua karte hain ke, Abraha aur uss ki fauj par fatah de, aur kaha ke, hum me to Abraha ki fauj ka saamna karne ki taqat nahi hai, to Aye Allah, tu hi apne Ghar ki hifazat kar”, ye dua karne ke baad Abdul Muttalib, Makkah khaali karke pahadon par chadh jaate hain, aur unhe yaqeen tha ke, Allah ka azab Abraha aur uss ki fauj ko gher lega.^{^[18]}

Ibn Abbas ki ek riwayat ke mutabiq, jiss ko Abd Ibn Humaid, Ibn al-Mundhir, Ibn Marduyah, Hakim Abu Nuaim aur Baihaqi ne transmit kiya hai, Abdul Muttalib apne oontton ki wapasi ka zikr uss me nahi hai, balke jab Abraha Taif aur Makkah ke beech as-Sifah pahuncha, to Abdul Muttalib uss se milne gaye, aur Abraha se kaha ke, tum itni door yahan kyun aye ho, tum sirf hume hukum karte, to hum tumhe jo chahe pesh kar dete. Abraha ne kaha ke, maine suna hai ke ye Kaba, Salamati ka Ghar hai: main iss ke sukoon ko barbaad karne aya hoon. Abdul Muttalib jawab dete hain ke, “Ye to Allah ka ghar hai, jiss ne iss ghar par kisi ko aaj tak ghalib aane nahi diya”, Iss par Abraha kehta hai ke, “Hum yahan se wapas nahi jayenge, jab tak hum iss ko tabah na kar dein”. Abdul Muttalib ne kaha ke, “Tum ko jo kuch chahiye, hum se le kar yahan se wapas ho jao”, Lekin Abraha ne unn ki baat nahi maani, aur fauj se kaha ke aagay badho, aur wo Abdul Muttalib ko chhorrh kar aagay badh jaate hain.^{^[19]}

Maulana Maudoodi kehte hain ke; Agar inn do riwayat ko jaise hain - waise hi chhorrh dein, tab bhi ek baat ye wazeh hai ke, Quraish aur Makkah ke atraaf ke qabilon me itni taqat nahi thi ke wo Abraha ki fauj ka muqabila karke Kaba ko bacha le. Issi liye Quraish ne koi koshish nahi ki, kyun ke, jung-e-khandaq ke maukhe par hum ye sunn chuke hain ke, Quraish sirf 12,000 ki fauj hi jama kar paye jiss me tamam Arab qabile aur yahoodi qabilon ki afwaaj thi, ye sab mil kar bhi Abraha ke 60,000 ke lashkar ka muqabla nahi kar sakte the. Abdbul Muttalib Makkah wapas aa kar Makkah walon ko shehr chhorrhne ka hukum diya, aur Kaba me ja kar Allah se dua ki, yahan ghaur karne wali baat ye hai ke, uss waqt Kaba ke atraaf 360 butth the, Abdul Muttalib aur unn ke saathi, unn tamam butthon ko chhorrh kar sirf ek Allah ki madad ke liye pukaare aur baaqi sab khudon ko bhula diya, tareeq ki kitabon me koi aur naam nahi likha hai, sirf aur sirf Allah wahidul qahhar ka naam likha hai, kyun ke, jab museebat ayee to sirf Allah ko pukara gaya.^{^[20]}

Doosre din, Abraha ne Makkah me daakhil hone ki tayyari shuru ki, aur fauj ko hukum diya ke uss haathi Mahmood ko Kaba ki taraf rukh karwao, uss waqt Nufail jiss ko Abraha ne qaid kar liya tha, wo haathi ke qareeb ja kar, uss ka kaan pakad kar kehta hai ke, “Jahan se aya hai wahan wapas chala ja, kyun ke, beshak tu Allah ke Muqaddas Shehr me hai”, Nufail uss haathi ka kaan chhorrh deta hai aur haathi fauran baitth jata hai. Haathi chalane wale, tamam koshish ke bawajood bhi, haathi ko Makkah me daakhil na kar sake, tamam koshishein bekaar ho gayee. Uss haathi ko bhaalon se, teeron ko uss ki soontt me chuba kar, uss ke sarr me bhonk kar koshish kar li - lekin haathi ko wahan se hila nahi paye, wo khada ho ke nahi deta tha. To unhone uss ko Yemen ki taraf rukh karke utthaya to wo daudne laga, phir uss ko Syria ki taraf rukh kiya to tezi se chalne laga, aur phir East yani Mashriq ki taraf rukh kiya to wo chalta raha, phir uss ko Makkah ki taraf rukh kiya to wo phir se baitth gaya.^{^[21]}

Ye khudai taqat ke izhaar ka ek pehlu tha, jo maujezana taur par zaher ho raha tha, aur doosri taraf kuch parindon ke jhund samandar ki taraf se aate huwe nazar aaye. Har parinde ke paas 3 kankariyan thi, ek kankar do panjon me aur ek pathar chonch me tha, jiss ka size chane ke size ke barabar tha. Waqidi kehte hain ke, ye parinde ghair mamooli the, anokhe dikhayi dete the, jo pehle kabhi nahi dekhe gaye. Wo kabootar se chhote aur unn ke panje laal rang ke the. Wo Abraha ke lashkar ke ooper pahunche aur unn par kankariyan girayi, har ek kankar bandooq ki goli se zyada nuqsan de thi. Wo jab kisi par girrti, to wo uss me ghus kar aar-paar ho jaati aur zameen dhas jaati.^{^[22]} Ye to sirf momentum ki wajah se hi nahi maare gaye, balke unn ke jism bhi phat kar girrne lage. Ibn Ishaq ki seerat ke mutabiq, smallpox, chechak pehli baar Arab me issi saal se shuru huwi. Ibn Abbas kehte hain ke, jiss kisi ko bhi kankari ki maar padi wo apna jism khirachne lagta, jis ki wajah se uss ki jild phatne aur tootne lagti, aur gosht jhadne lagta. Ek aur riwayat me, Ibn Abbas farmate hain ke, gosht aur khoon pani ki tarah behne lagta tha, yahan tak ke haddiyan nazar aane lagti. Abraha ka bhi yehi haal huwa.^{^[23]}

Abraha ki fauj ke haathi iss azab ko dekh kar ghabra kar bhag khade huwe, siway uss ke jo kankari ke maar se halak ho gaya, har koi fauran nahi mara gaya. Fauji mukhtalif directions me, mukhtalif simton me farar ho gaye aur unn ki dardnaak maut, wapasi ke raaste me huwi.^{^[24]} Nufail jiss ko qaidi bana kar Khath’am se laye the, uss ko dhoondne lage, taakay wo unn ko Yemen wapas pahunchaye, lekin uss ne Abraha ki fauj ki madad karne se inkaar kar diya.^{^[25]} Allah (سُبْحَانَهُ وَتَعَالَى) ki marzi thi ke, sab se sakht azab, Abraha ko mile - wo ek khaufnaak marz ka shikaar ho gaya, jo uss ke jism me phail gaya aur uss ke jism ka har aza, har hissa sadne laga aur uss ke haath aur payr jism se alag hone lage, ek ke baad ek ungli jhad gayee, issi halat me uss ka jism Yemen - pahunchaya gaya jaha uss ki maut huwi.^{^[26]} Maulana Maudoodi likhte hain ke, Abraha ki maut raaste me huwi Yemen pahunchne se pehle, Khath’am ke mukhaam par.^{^[27]}

Mahmood jo haathi tha, uss ke do chalane wale Makkah me reh gaye, aur dono andhe aur maflooj (paralyze) ho gaye aur Ibn Ishaq, Aisha (رَضِيَ ٱللَّٰهُ عَنْهَا) ki ek Hadtih nakhal karte hain ke, unhone inn do logon ko dekha, wo log andhe aur maflooj bheek maang rahe the. Aisha (رَضِيَ ٱللَّٰهُ عَنْهَا) ki behen Asma (رَضِيَ ٱللَّٰهُ عَنْهَا) ne bhi inn do logon ko Makkah me andhe aur maflooj bheek maangte dekha.^{^[28]}

Ye waqiya, Muzdalifa aur Mina ke beech me huwa, jiss ko Muhassir kehte hain jo wadi-e-Muhassab ke qareeb hai. Sahih Muslim aur Abu Dawood ki riwayat ke mutabiq, Rasoolullah (صلى الله عليه وسلم) Hajjatul-Wida me Muzdalifa se Mina tashreef laye to wadi-e-Muhassir me tezi ekhtiyar kare. Imam Nawawi iss ki tashreeh me kehte hain ke, kyun ke, wadi-e-Muhassir me,…, Ashaab-e-Feel par,…, Allah ka Azab aya, issi liye hajiyon ko hukum hai ke, wadi-e-Muhassir me ruke nahi, jald-se-jald wahan se nikal jaye.^{^[29]}

Ye ek aisa waqiya tha, jo saare Arab me iss ki khabar phail gayee, aur kayee shayeron ne iss ke baare me shayr kahe, aur issi se bohot saari baatein milti hain. Ye hi nahi, balke Umm Hani (رَضِيَ ٱللَّٰهُ عَنْهَا) aur Zubair Ibn Al Awwam (رَضِيَ ٱللَّٰهُ عَنْه) se riwayat hai ke, Rasoolullah (صلى الله عليه وسلم) ne farmaya ke, Quraish Allah ke siway kisi aur ki Ibadat nahi kare, dus saal tak. Ek aur riwayat ke mutabiq 7 saal tak. Ye waqiya jiss saal pesh aya, uss saal ko aam-ul-feel kaha jaat hai, aur issi saal aap (صلى الله عليه وسلم) paida huwe. Ye waqiya aam-ul-feel ke Muharram mahine me huwa aur aap (صلى الله عليه وسلم) Rabi-ul-Awwal me paida huwe, iss waqiye ke sirf 50 din ke baad.^{^[30]}

Chronological Order of Suras

Order	Sura Name	Number	Type	Note
18	At-Kafiroon	109	Meccan
19	Al-Fil	105	Meccan

Ye Surah ka backgroun ya pas-manzar hum abhi sune, ye har kisi ko pata tha - to poori kahani batane ki zaroorat nahi thi. Poore Arab ko pata tha, aur wo iss baat ko maante the ke, Kaba ki hifazat kisi butth ya koi aur khuda ne nahi ki thi, balke Allah Azza-wa-Jalla ne khud ki thi. Quraish ke sardaron ne Allah hi ko pukaara tha, iss ki hifazat ke liye. Aur iss waqiye se mutassar ho kar, Quraish ne kayee saal (7 ya 10 saal tak, jaisa riwayaton me ata hai) sirf Allah hi ki ibadat ki. To iss waqiye ki taraf ishara karna hi kaafi tha, ye batane ke liye ke, ye wohi Allah hai jo Muhammadur Rasoolullah (صلى الله عليه وسلم) ke zariye - ab Quraish ko apni taraf dawat de raha hai ke, ussi Allah ki ibadat karo jiss ne tum ko Ashaab-e-Feel se bachaya tha. Aur agar aisa nahi karoge ya Allah ki aur uss ke Rasool (صلى الله عليه وسلم) ki mukhalifat karoge, to tumhara bhi wohi haal hoga jaisa Ashaab-e-Feel ka huwa tha.

Maujeze - Ashaab-e-Feel ke waqiye me

Iss Waqiye me jo Maujezay hain wo ye hain;

● Pehla to Haathi ka baitth jaana, jiss ko Rasoolullah (صلى الله عليه وسلم) ne bhi tasleem kiya Hudaibiya ke maukhe par, jab Qaswa baitth gayee aur Hudaibiya ke aagay nahi ja rahi thi, jab logon ne kaha ke Qaswa Badtameez ho gayee hai, to aap (صلى الله عليه وسلم) ne farmaya ke badtameezi iss ki fitrat me nahi hai, Qaswa ko to USSI qudrat ne roka jiss ne, haathi ko Makkah me dakhil hone se roka tha.

● Doosra Parindon ka bheja jana, ye koi ittefaaq nahi tha, ke wo parinde kankariyan oonchai se giraye

● Parindon ko kaise maaloom tha ke unn ko ek nahi, do nahi, teen-teen pathar ya kankari utthana hai?

● Unn kankariyon ki speed aur momentum, jiss ki wajah se wo faujiyon aur unn ki sawariyon ke aar-paar ho gaye

● Unn kankariyon me jaraseem ya kisi nukhsaan de cheez ka hona, kyun ke,

○ Ek to wo, khujane ya khirachne lage

○ Chamdi ka phatt jana

○ Khoon aur pus ka nikalna

○ Ghost aur jism ke hisse, jism se alag ho jana

○ Aur ek khaufnaak maut

● Aur Aakhir me, Mahmood haathi ke do chalane walon ka zinda rehna, aur Makkah me bheek maangna. Ye har roz, log inn ko dekhte, aur iss waqiye ki yaad ko zinda rakha gaya.

● 40 saal baad, Quran me iss ka zikr ana. Ye sab Allah ki nishaniyan nahi to aur kya hai?

Ye iss liye yahan bayan kiya ja raha hai, kyun ke, log inn supernatural cheezon ko nahi maante, har cheez ko rationalize karna chahte hain, Allah ki qudrat ko, uss ke ilm ko, apni aqal ke daire me rakh kar sonchte hain. Allah (سُبْحَانَهُ وَتَعَالَى) azeem qudrat ka malik hai, natural laws ki bandish uss ko nahi rok sakti – wo har cheez se bartar aur alaa hai. Wo Qaadir-e-mutlaq hai.

Iss mazmoon ko hum aagay detail me samjhenge, jab har lafz ko samjhenge.

Tafseer Surah Al Feel – Part 1

Introduction

Surah ka pas-manzar aur maqsad (Background of Surah and its Purpose)

Chronological Order of Suras

Maujeze - Ashaab-e-Feel ke waqiye me

References