Tafseer Surah al-Maun Part 1

Tafseer Surah al-Maun Part 1


Bismillah Alhamdulillah was salaatu was salaamu ala rasoolillah

Rabbish sharah li sadri wa yassirli amri wahlul uqdatam min lisaani wa yafqahu qauli

As Salaamu Alaikum wa Rahmatullahi wa Barakatuh

Pichle hafte hum Surah Al-Kauthar ki tafseer sune, aur aaj In Sha Allah Surah Al-Maun ko samajhne ki koshish karenge, iss Surah me samjhane ka bohot hai to iss ko 2 ya 3 session me karenge:

Introduction

Suratul Maun – Quran ki 107wi surat hai, lafz e Al Maun iss surat ki aakhri ayat me aya hai. Imam Bukhari ne iss surat ko Surah Araita ka naam diya jo pehla lafz hai iss soorat ka, aur Imam Al Suyuti ne iss ko Surah Al-Deen kaha hai, ye lafz bhi Surah ki pehli ayat me hi hai.

Ab yahan structure of the quran ki rooh se, Raymond Farrin apni kitab Structure and Quranic Interpretation me likhte hain, 4 suraton ke ye set me ke, doosre jode ki pehli surat hai, ye Surah Al Maun;

  • Surah Al Feel, Surah Quraish, Surah Al Maun aur Surah Al Kauthar me rabt hai, connection hai,
  • Surah Al Feel “Alam Tara” – Kya tum ne nahi dekha se shuru hoti hai, aur
  • Surah Al Maun “Araital Lazi” – Kya tum ne dekha se shuru hoti hai, matlab dono suratein dekhne ke mazmoon se shuru hoti hai, aur ye dawat deti hain ke ghaur-o-fikr karne ki.
  • Iss aitebar se inn me rabt hai.
  • Phir Suratul Kauthar ke comparison me, dono suraton me subject ke hisab se munasibat hai – dono surah salat aur sadaqah ke baare me hain. Matlab Islam ke do basic ya buniyadi teachings se hai, namaz kaise parrhte hain aur sadaqah kaise dete hain.
  • Israr Ahmed Tadabbur-e-Quran ke nazariye se ye bayan karte hain ke, Surah Al Maun Quraish ke sardaron ke baare me hai, jin ke negative amaal ka zikr kiya gaya, aur ye unn amaal ke bar-aks hain jo aap (صلى الله عليه وسلم) ke amaal the, jiss ka zikr Surah Al Kauthar me hain. Ye jo contrast inn do suraton me hai, uss ki wajah se, aap (صلى الله عليه وسلم) ki importance Surah Al Kauthar me zahir ho kar saamne aayee.

Surah ka pas-manzar aur maqsad (Background of Surah and its Purpose)

Ibn Abbas (رَضِيَ ٱللَّٰهُ عَنْهُ) apni tafseer me, Tafseer Jalalayn me hai ke, ye Surah Aas ibn Wail ke baare me nazil huwa aur Al Wahidi – Asbab Al Nuzul me likhte hain ke,

  • Muqatil aur al-Kalbi ne kaha ke, ye Surah Aas ibn Wail ke baare me nazil huwa
  • Ibn Jurayj ne kaha ke, ye Surah Abu Sufyan par nazil huwa jo abhi tak islam qabool nahi kare thay. Abu Sufyan har hafta do oontt zibah karte aur ek waqt ek yateem unn ke paas aya kuch maangne ke liye. To Abu Sufyan ne uss yateem ko apni chhadi se maarte huwe bhaga diya.

Chronological Order of Suras

Order

Surah Name

Number

Type

Note

15

Al-Kawthar

108

Meccan

Madinan Surah according to Hadith

16

Al-Takaathur

102

Meccan

–

17

Al-Maaun

107

Meccan

Only 1-3 from Mecca; the rest from Medina

Ibn Abbas, Ata aur Jabir kehte hain ke, ye Surat Makki hai aur uss ki wajah, wo iss surat ki pehli teen ayat ke Hawale se aur jo detail humne abhi suni uss ke hawale se batate hain. Lekin Ibn Abbas, Qatadah aur Dahhak kehte hain ke, ye Surat Madani hai aur uss ki wajah, wo iss surat ki aakhri 4 ayaat ke hawale se batate hain, kyun ke Makkah me namaz chhup kar parrhi jaati thi, aur bahar aakar dikhawe ki namaz parrhne wale Munafiqeen Madina me hi the.

Ibn Abbas ka ye khayal hai ke iss surat ka kuch hissa yani pehli teen ayaat Makkah me aur kuch hissa yani aakhri chaar ayaat Madina me nazil huwe.

Tarjuma wa Tafseer

Ab aaiyye Surah Al-Maun ke tarjuma par:

أعُوذُ بِاللهِ مِنَ الشَّيْطَانِ الرَّجِيم

Main Allah se panah mangta hoon, Allah (سُبْحَانَهُ وَتَعَالَى) ke protection me aata hoon, shaitan se jiss ko pathar maar ke bhaga diya gaya hai.

بِسْمِ اللَّهِ الرَّحْمَٰنِ الرَّحِيم

Shuru Allah ke naam se jo taras kha kar faida pahunchane wala hai.

Vs No 1:

أَرَءَيْتَ ٱلَّذِى يُكَذِّبُ بِٱلدِّينِ

Kya tum ne uss shaks ko dekha, jo aakhirat ki jaza aur saza ke din ko jhutlata hai?

Iss ayat me samajhne wale teen alfaaz hai, wo hai Ara’aita, Kazib aur Deen.

NARA ( We see ) 2:55

Ra’aita ki detail hum surah An Nasr me sunn chuke hain, iss ka matlab dekhne se hai, iss ayat me A’ra’aita aya hai jiss ka matlab “Kya tum ne dekha”, yahan dawat di ja rahi hai ghaur-o-fikr karne ke liye.

YAKZIBUUN ( They deny ) 2:10

Dr. Mir Aneesuddin, apni kitab Explanatory Dictionary of the Holy Quran me likhte hain ke, Yukazzibu ka root ya maddah Kaaf, Zaal, Bay hai. Aur Qurani ayaat se jo matlab nikalta hai wo ye ke, iss lafz ka aam matlab jhoot, inkar, jhutlana, batil ya ghalati ki halat me rehna, hai. Aur jo koi iss me mubtala ho jata hai wo;

  • Kaafir hai,
  • Munafiq hai,
  • Mujrim hai, aur
  • Zalim hai.

Aise log aam taur par, inkaar karte hain;

  • Allah (سُبْحَانَهُ وَتَعَالَىٰ) ke Rasoolon aur Nabiyon ka,
  • Allah (سُبْحَانَهُ وَتَعَالَىٰ) ki ayaat aur nishaniyon ka,
  • Uss haq ka, jo Allah (سُبْحَانَهُ وَتَعَالَىٰ) ne bheja hai, uss ki kitabon ki shakal me,
  • Maut ke baad ki zindagi ka, inkar karta hai.

Aise Shaks ki misal iss Surah Al Maun me di gayee hai ke wo;

  • Yateem ko dhakke deta hai,
  • Ghareeb aur miskeen ko khana khilane ke liye logon ko targheeb aur talqeen nahi karta,
  • to aise namaziyon ke liye kharabi, tabahi aur barbadi hai, jo
  • namaz ki taraf se ghafil hain, aur
  • dikhawe ke liye namaz parrhte hain, aur
  • aam istemaal ki baratne ki cheeze logon ko maangne par bhi nahi deta,
  • Qiyamat ke din, ye apne aap ke khilaf jhoot kahenge, aur
  • Dozaq ki aag ki saza payenge.

Lafz-e-Kazb inn cheezon se, associated hai;

  • Dil se,
  • Muh modh lene se ya pher lene se,
  • Inkar karne se
  • Nahi manne se ya na-farmani se,
  • Bakhalat se ya kanjoosi se,
  • Gunah se,
  • Baghawat se,
  • Takabbur se,
  • Hadd se agay badhne se,
  • Na-insafi se,
  • Nukhsan se,
  • Mazaq udane se,
  • Khwaheshat se,
  • Jhooti batein gadh lene se,
  • Ghalati se,
  • Tabahi se.

Kazb ke jo opposites hain, wo hain;

  • Sachai,
  • Achai,
  • Roshan daleel,

Ab jo ahadith Kazb par ayee hain, wo hain;

  • Banda musalsal jhoot bolta rehta hai, aur uss ke dil me ek kala dhabba badhta chala jata hai yahan tak ke uss ka sara dil kala ho jata hai, phir Allah ki nazar me wo jhoot bolne walon me likh diya jata hai.
  • Ek aur Hadith me ata hai ke, Insan sach bolta hai jab tak ke uss ka shumaar sadiqeen me ho jata hai aur ek shaks jhoot bolta hai jab tak ke uss ka shumaar jhoot bolne walon me ho jata hai.
  • Rasoolullah (صَلَّى ٱللَّٰهُ عَلَيْهِ وَسَلَّمَ) ne farmaya ke, Ek Musalman doosre Musalman ka bhai hai, to iss aitebar se, wo apne bhai ko na dhoka de sakta hai, na jhoot bol sakta hai aur na uss ki madad kare baghair chhorrh sakta hai…
  • Qiyamat tabh tak nahi ayegi, jab tak ke 30 jhoote dajjal na zahir ho jaye, jo Allah aur uss ke Rasool (صَلَّى ٱللَّٰهُ عَلَيْهِ وَسَلَّمَ) par jhoot bolenge. Matlab ye ke, 30 log nubuwwat ka dawa karenge qayamat aane se pehle tak.
  • Aap (صَلَّى ٱللَّٰهُ عَلَيْهِ وَسَلَّمَ) ne farmaya ke, mere baare me jhoot mat bolo, aur agar aisa koi karta hai to, wo jahannam ki aag me hoga.
    • Matlab ye hai ke, agar Rasoolullah (صَلَّى ٱللَّٰهُ عَلَيْهِ وَسَلَّمَ) ne koi baat nahi kahi ho aur hum uss ko ye keh kar phailayenge ke aap (صَلَّى ٱللَّٰهُ عَلَيْهِ وَسَلَّمَ) ne kaha hai to uss ka thikana Jahannam hai.
    • Hume kya karna chahiye?
    • Whatapp par ya kisi bhi platform par, koi bhi cheez, kitni bhi achi lagti ho, bina tehqeeq kiye forward nahi karna chahiye.
  • Jhoot bolne walon ki saza ka zikr iss hadith me yun aya hai ke, inn ke muh se lekar kaan tak – gaal ka hissa cheer diya jayega, aur aakhirat me yehi saza unn ko milegi.
  • Ab ye hadith hamare aaj kal ke halath ke hisab se bohot hi mauzu hai, Logon par ghaddari aur dhoke ke saal ayenge, jab ek;
    • jhoote ko imandaar aur ek dayanatdaar ko jhoota samjha jayega, aur ek
    • ghaddar ko wafadaar aur ek wafadaar ko ghaddar samjha jayega, aur
    • Ruwaibidah mamelaat ka faisla karengay.
    • Logon ne poocha, ke ye Ruwaibidah kaun hai?
    • Aap (صَلَّى ٱللَّٰهُ عَلَيْهِ وَسَلَّمَ) ne farmaya, ghatiya aur be-buniyad admi jo logon ke mamelaat ko control karte hain.
    • Ab ghaur kariye, ke hamare political system me kya ho raha hai.
  • Aap (صَلَّى ٱللَّٰهُ عَلَيْهِ وَسَلَّمَ) ne farmaya ke, meri ummat me, aise log utthenge, jo taqdeer ka inkaar karenge.
  • Aap (صَلَّى ٱللَّٰهُ عَلَيْهِ وَسَلَّمَ) kabhi jhoot nahi bole, aur iss ka logon par aisa asar tha ke, aap (صَلَّى ٱللَّٰهُ عَلَيْهِ وَسَلَّمَ) jo kuch bolte log uss ko sach maan lete. Umayya bin Khalaf ke baare me aap (صَلَّى ٱللَّٰهُ عَلَيْهِ وَسَلَّمَ) ne kaha ke wo uss ka qatl karenge, wo iss darr se Jung-e-Badr me shareek nahi hona chahta tha, lekin Abu Jahl ke ukasaane par wo shamil huwa aur mara gaya.
  • Aap (صَلَّى ٱللَّٰهُ عَلَيْهِ وَسَلَّمَ) ne ek lambi dua me unn logon ke khilaf dua ki, jo Rasoolon ka inkaar karte hain…
  • Aap (صَلَّى ٱللَّٰهُ عَلَيْهِ وَسَلَّمَ) ne farmaya ke, wo shaks jhoota nahi hai, jiss ne do logon ke beech sulah karwane ke liye jhoot bola.

DEEN ( The judgement, Law ) 1:3

Lafz-e-Deen ko hum Surah Al Fatiha aur Surah An Nasr me tafseel me sunn chuke hain aur iss ka matlab hai;

  • Qanoon ya Law ke,
  • Deen jaise Religion ke,
  • Yaumid-Deen yani Qiyamat ke din ke, jiss din jaza aur saza ka faisla hoga

Kyun ke ye Surah shuru ho raha hai ek sawal se ke, “Kya tum ne dekha”, to ek sawal paida hota hai ke, kya dikhana chahte hain Allah (سُبْحَانَهُ وَتَعَالَىٰ)? Ab yahan kayee jawab ke combinations ho sakte hain, kyun ke sawal huwa hai;

  • Pehla, uss shaks ko jo jhutlata hai, inkar karta hai, aur uss ghalati ko durust bhi nahi karta, kis cheez ko jhutlata hai?
  • Abhi humne suna Kazb ki tafseel me ke wo jhutlata hai;
    • Allah (سُبْحَانَهُ وَتَعَالَىٰ) ke Rasoolon aur Nabiyon ko,
    • Allah (سُبْحَانَهُ وَتَعَالَىٰ) ki ayaat aur nishaniyon ko,
    • Allah (سُبْحَانَهُ وَتَعَالَىٰ) ki kitabon ko,
    • Aur Maut ke baad ki zindagi ko.
  • Iss ayat me Deen ka lafz aya hai to ab kya matlab huwa;
    • Allah (سُبْحَانَهُ وَتَعَالَىٰ) ke qanoon ko yani ke Quran ko jhutla raha hai, aur issi ke zariye Allah ke Deen ko jhutla raha hai, aur ek matlab hoga,
    • Qiyamat ke din ko jhutlana, ye asal me hai sab se bada problem.
    • Jab insaan Saza aur Jaza ke din ko jhutlata hai, uss ka inkaar karta hai aur uss ghalati se bahar nahi nikalta, to yehi tamam buraiyyon ki jadh hai,
  • Kazb ka opposite Iman hai, aur momin-o-muttaqi kaun hai, Surah Al Baqarah me farmaya ke;

وَٱلَّذِينَ يُؤْمِنُونَ بِمَآ أُنزِلَ إِلَيْكَ وَمَآ أُنزِلَ مِن قَبْلِكَ وَبِٱلْـَٔاخِرَةِ هُمْ يُوقِنُونَ

Wo log jo pehle ki kitabon par aur iss Quran par iman rakhte hain aur – ab yahan underline karke suniye – “Wa Bil Aakhirati hum yuqinoon” Roz-e-Mahshar par, Saza aur Jaza ke din par, yaqeen rakhte hain.

  • Agar ye yaqeen khatam ho jayega to kya hoga?
  • Wohi hoga, jo aaj ho raha hai, saal bhar parrhahi ho rahi hai lekin exam nahi ho raha hai, to jab result nahi ayega to parrh kar kya faida – Parrhahi karne wala aur nahi parrhne wala dono barabar ho gaye.
  • Quran me kayee jagah Allah (سُبْحَانَهُ وَتَعَالَىٰ) farmate hain, iss duniya ki zindagi ke baare me ke;
    • Ye zindagi ek imtehaan hai, Uss ne zindagi aur maut ko paida kiya – taakay tum ko aazmaye
    • Humne tum ko mile-jhule nutfe se banaya, taakay tum ko aazmaye, issi liye tum ko dekhne ki aur sunne ki taqat di.
    • Aur Uss ne, Zameen aur Aasmaan banaye, taakay tum ko aazmaye.
    • Ye hai asal me hamari iss zindagi ka maqsad. Iss duniya me sirf aazmaish ke liye paida kiye gaye ho
    • Jo kuch yahan karoge, uss ka asal faisla Qiyamat ke din hoga.
  • Iss duniya ki zindagi me jo jurm log karte hain, kya uss ki saza yahan milti hai? Nahi ye zaroori nahi,
    • Underworld ke Don hain, behisab gunah kar rahe hain, zaroori nahi ke uss ki saza iss duniya me mile. Jis level ka crime ho raha hai uss level ki saza yahan nahi mil sakti, agar kuch saza ho bhi gayee to wo apne political connections ki wajah se azad ghoom rahe hain.
    • Zabardasti zina kiya – azad ghoom rahe hain, koi saza nahi. Ulta mujrim ke khilaf koi shikayat na kare, iss wajah se jiss ke saath zabardasti ki, uss ke poore khandan ko khatam kar diye – phir bhi azad ghoom rahe hain.
  • To pata chala ke, iss duniya me aise logon ke liye chhoot hai, unn ki saza iss duniya me nahi aakhirat me hogi, jo saza aur jaza ka din hai.
  • Agar roz-e-mahshar par iman nahi hoga to log gunah karte chale jayenge,
  • Humne Surah Al Masad me Naar ke description me suna tha, dozaq me kin kin logon ko saza hogi, wo list yaad kar lijiye, ya Surah Al Masad ka pehla session Youtube par hai wo dekh lijiye, tafseel wahan mil jayegi.
  • Iss ke bar-aks, contrast me, Musalman aur khas taur par Momin;
    • Pehle to gunah karne se hi darega, kyun ke, uss ka iman aakhirat par hai, uss ko aakhirat ki saza ka pata hai. Allah se dar kar gunahon se bacha rahega.
    • Doosre, wo agar gunah karta bhi hai, to iss duniya me fauran uss ki pakkad ho jayegi, aur wo uss gunah se tauba kar lega aur Allah ne chaha to dozaq me jaane se bach jayega.
    • Aur agar gunah kiya aur tauba nahi ki, to phir wo bhi dozaq me jayega, aur saza milne ke baad, uss ko phir jannat me dala jayega.

أَرَءَيْتَ ٱلَّذِى يُكَذِّبُ بِٱلدِّينِ

Kya tum ne uss shaks ko dekha, jo aakhirat ki jaza aur saza ke din ko jhutlata hai?

Phir agay kya ghaur karna hai, ke uss shaks ke aur kya qualities hain?

Vs No 2

فَذَٰلِكَ ٱلَّذِى يَدُعُّ ٱلْيَتِيمَ

Ye wohi hai, jo Yateem ko dhakke deta hai,

Matlab Yateem ko uss ka haq nahi deta aur uss ko dhakka maar kar bhaga deta hai, to iss ayat me bhi do alfaz hai samajhne wale, wo hai Yadu’oo aur Yateem.

DA-AA ( Push ) 52:13

Ye lafz Quran me do ayaat me aya hai, jiss ka root ya maddah Daal, Ain, Ain hai.

  • Iss ke maane hain, dhakalna, dhakka lagana
  • Surah Toor me aya hai ke, (يَوْمَ يُدَعُّونَ إِلَىٰ نَارِ جَهَنَّمَ دَعًّا) Jiss din unn ko (mujrimo ko), dhakke de de kar jahannam ki taraf dhakela jayega. Aur kaha jayega ke, Yehi wo aag hai, jiss ko tum jhutlaate the.

Ahadith me bhi ye lafz ke maane dhakelne ke aye hain, Sahaba (رَضِيَ ٱللَّٰهُ عَنْهُم) – aap (صلى الله عليه وسلم) ko gher rehte, na to unn ko aap (صلى الله عليه وسلم) se dhakela jaata aur nahi wo aap (صلى الله عليه وسلم) se Sahaba muh phere rehte.

Iss ayat ka doosra lafz hai;

AL-YATAAMAA ( The orphans ) 108:2

Yateem ya Yataamaa ka root ya maddah Yay, Tay, Meem hai. Arabi zaban me, Al-Yutmu, akele aur tanha reh jaane ko kehte hain. Quran me lafz-e-Yateem orphan ke liye aya hai. Bin baap ka baccha Yateemun keh lata hai, jab tak wo jawan na ho jaye, iss liye Quran me aya hai ke, “Yateem ke maal ke paas bhi na jao, magar aise tareeqe se ke, wo pasandeeda ho, yahan tak ke wo jawani ko pahunch jaye…

Aur ladki ko yateematun kehte hain, jab tak ke uss ki shadi na ho jaye, issi liye Quran me aya hai ke, “Yateemo ko jaanchte parakhte raho, yahan tak ke wo nikah ki umar ko pahunch jaye…”. Collectively, Quran me inn ko Al Yatama kaha gaya hai. Yateemo ke mutalliq jo ahkamat Quran me aye hain wo ye hain;

  • Aap (صَلَّى ٱللَّٰهُ عَلَيْهِ وَسَلَّمَ) se Yateemo ke baare me sawal kiya gaya, to uss ke jawab me farmaya ke;
    • unn ke halaat ki islah bohot acha kaam hai.
    • tum apna kharch unn ke kharch se mila-jhula kar karna chaho to, wo tumhare bhai hain.
    • iss silsile me ek hadith aagay sunenge.
  • Aur yateemo ka maal unn ko wapas kar do, aur acchi cheezon ko buri cheezon se badal matt dena, aur unn ke maal ko apne maal ke saath mila kar na kha jao, ye bohot hi bada gunah hai. Ye Surah An Nisa ki Doosri ayat hai, aur agay farmaya
  • Aur agar tum ko khauf ho ke, yateem ladkiyon ke sath tum insaf na kar sakoge, to inn me se – jo tum ko pasand aaye, Do ya Teen ya Chaar se nikah kar lo…
  • yahan thoda ghaur-o-fikr karna hai ke;
    • aam taur par musalman ummat me – ye aam understanding hai ke, Musalmano ko char shadiyan karne ki ijazat hai,
    • lekin kisi ko bhi ye nahi maaloom ke ye ijazat kyun di gayee hai?
    • Surah Nisa ki iss ayat me yateemo me se do ya teen ya chaar se shadi, kyun karne ko kaha ja raha hai?
    • unn ko support karne ke liye, Jung-e-Uhud ke baad, Musalmano ke 70 earning members shaheed ho gaye, jis ki wajah se ek economic aur financial crisis aa gayee, Madine ke City-State government ke liye.
    • Ye hukum sirf aur sirf uss crisis ko hall karne ke liye diya gaya na ke, enjoyment ke liye.
    • Enjoyment iss problem ke solution ka side-effect hai, asal problem to financial crisis ko solve karna tha.
  • Phir agay farmaya ke, jo yateemo ka maal na-jayez tareeqe se kha lete hain wo apne paytt me aag bhar rahe hain
  • Phir hukum huwa ke, Ahsan karo;
    • Maa-Baap ke saath,
    • Rishtedaaro aur Yateemo aur misakeeno ke saath,
    • Rishtedaar padoshiyon ke saath aur ajnabi padosiyon ke saath,
    • Doston aur wo log jin ke saath uthte-baithte ho, unn ke sath, ahsan karo
  • Nek wohi hai, iss ayat me ek amaal ki list gina kar farmaya ke, jo Allah se mohabbat ki wajah se, apna maal rishtedaro, yateemo aur miskeeno par kharch kare, wohi log nek hain.
  • Jo kuch khair tum kharch karte ho, apne maa-baap par, uss me rishtedaro, yateemo aur miskeeno ka hissa bhi hona chahiye,
  • Yateem bacchon ke baare me insaaf par qayem raho,
  • Maal-e-ghanimat, booty of war me se, paanchwa hissa, one-fifth – Allah ke liye hai, uss ke rasool (صلى الله عليه وسلم) ke liye, rishtedaron ke liye, yateemo, miskeeno aur musafiron ke liye hai
  • Jo maal Allah ne apne Rasool ko basti walon se dilwaya hai wo;
    • Allah ka hai aur
    • uss ke Rasool (صلى الله عليه وسلم) ke liye hai, aur
    • Rishtedaaron ke liye, aur
    • Yateemo ke liye, aur
    • hajatmandon yani miskeeno ke liye aur musafiron ke liye hai.
    • Ye hukum kyun diya ja raha hai? Aagay issi ayat me jawab dete huwe farmaya ke,
    • Kahin aisa na ho ke jo log tum me daulatmand hai, ameer hain, ye daulat unhi ke haathon me na phirti rahe.
    • To jo kuch Rasoolullah (صلى الله عليه وسلم) tum ko de dein, wo le lo aur jiss cheez se mana kare, uss se ruk jao.
    • Ye ayat poori duniya ke economic problem ka hall hai, solution hai.
  • Mujrimeen ke qualities ginate huwe farmaya ke, Nahi tum log yateem ki khatir nahi karte aur miskeeno ko khana khilane ki targheeb nahi dete,
  • Insan ke qualities bayan karte huwe farmaya ke, kya tum ko ghaati ya chadao ya mushkil raaste ka pata hai? phir uss ko samjhate huwe farmaya ke,
    • kisi ghulam ko azad karana, ya
    • bhook ke din khana khilana, kis ko
    • uss yateem ko jo rishtedaar bhi ho, ya
    • ya phir aise miskeen ko jo mitti me, ya ghandh me ata huwa ghareeb,
  • Phir aap (صلى الله عليه وسلم) ko address karke farmaya ke, aap bhi kisi yateem par sakhti na kariye
  • Surah Kahf me farmaya ke, Allah (سُبْحَانَهُ وَتَعَالَىٰ) khud yateemo ke maal ki hifazat karta hai

Jo alfaz Quran me Lafz-e-Yateem ke sath aye, wo hain;

  • Waladain,
  • Rishtedaar,
  • Ghreeb ya miskeen, aur
  • Qaidi, ya Prisoners.

Lafz-e-Yateem par Ahadith ye hain;

  • Yateem ke wali, ya guardian ka shadi-shuda auraton par koi ikhtiyar nahi aur yateem ladki ki shadi ke liye uss se mashwara karna zaroori hai. Aur agar wo mana kar de to uss ka nikah zabardasti na karo. Aur agar wo khamosh ho jaye to ye uss ki raza mandi samjho.
  • Rasoolullah (صلى الله عليه وسلم) ne farmaya ke, main aur yateemo ka khayal rakhne wala aise honge. Do ungliyon ko jodh kar bataya.
  • Jab ye hukum nazil huwa ke “Yateem ke maal ke qareeb bhi matt jao, siway aise tareeqe ke jo pasandeeda ho…” aur jab ye wa’eed nazil ho gayee ke “jo yateemo ka maal na-jayez tareeqe se kha lete hain…” to jo log yateemo ke zimmadaar the, wo apne khane aur peene ki cheezon ko yateemo ki cheezon se alag kar liye, aur agar kuch khana yateemo ka bach jata to wo uss ko aise hi chhorrh dete jab tak yateem uss ko na kha le, ya wo kharab na ho jaye. Ye logon par ek bhoj ki tarah ho gaya, to wo aap (صلى الله عليه وسلم) ko report kare, jiss par phir ye ayat nazil huwi ke, “unn ke halaat ki islah bohot acha kaam hai, tum apna kharch unn ke kharch se mila-jhula kar karna chaho to, wo tumhare bhai hain.” Iss ke baad wo log apne khane aur peene ki cheezen milane lage.
  • Aisha (رَضِيَ ٱللَّٰهُ عَنْهَا) ek yateem ki dekh-bhaal kiya karti thi, aur salana uss yateem ke maal par zakat ada karti thi.
  • Aap (صلى الله عليه وسلم) ne dua ki ke, “Aye Allah main in do zayeefon ke huqooq ko muqaddas qarar deta hoon; auraton ke aur yateemon ke huqooq ko”
  • Yateemo ko apne bacchon ki tarah samjho aur waise hi salook karo jaise apne bacchon ke saath salook karte ho.
  • Rasoolullah (صلى الله عليه وسلم) ne saath cheeze mana farmayee, jiss me se Yateem ke maal ko na-jaiz tareeqe se kha lena hai. Ye kabeera gunahon me se ek gunah hai.
  • Yateem ka khayal rakhne wala agar ghareeb hai, to uss ko yateem ke maal me se apne liye istemaal karne ki ijazat hai, ba-sharte ke wo fuzool kharchi na kare, aur maal ko zaroorat parrhne se pehle na kharch kare, aur na yateem ke maal ko apne liye jama kare. Aur agar yateem ka khayal rakhne wala ameer hai to wo yateem ke maal me se kuch nahi le sakta.
  • Jo zayeef ho, kamzor ho ya weak ho, wo yateem ke maal ki zimmadari na le. Kyun ke agar iss ko sahih tareeqe nahi nibhaya to wo Qiyamat ke din sharm aur afsos ka zariya ban jayega.
  • Ek lambi hadith me, Ibn Abbas (رَضِيَ ٱللَّٰهُ عَنْهُ) se poochha gaya ke yateem ki zimmadari kab khatam hoti hai, to aap ne jawab diya ke, agar yateem bada ho kar apne zarooriyat ka khayal khud kar sakta hai to uss ki zimmadari khatam ho jaati hai. Aur agar koi aisa ho, chahe wo boodha hi kyun na ho jaye, aur apni zarooriyaat ka khayal nahi rakh sakta aur uss ka haq logon se nahi le sakta, to wo yateem hai aur uss ka khayal rakhna chahiye.
  • Romans yani ke Christians ke paanch khususiyaat ka zikr karte huwe kaha gaya ke unn ki khasiyat Yateemo aur kamzoron ki madad karna hai aur ho sakta hai, ye paanch qualities ki wajah se ye Qiyamat se pehle aksariyat me honge.

To jo kaam karne ke hain, yateemo ke mutalliq, unn kamo ko chhorrh kar, unn ka khayal nahi rakhenge, aur unn ko be-izzat karne jaise kamo se mana kiya ja raha hai. To kaha ke

فَذَٰلِكَ ٱلَّذِى يَدُعُّ ٱلْيَتِيمَ

To jo deen ko, Allah ke Qanoon ko aur Roz-e-Qiyamat ko jo jhutlata hai, wohi hai jo yateem ko dhakke maarta hai aur

Vs No 3

وَلَا يَحُضُّ عَلَىٰ طَعَامِ ٱلْمِسْكِينِ

Aur faqeer ko, miskeen ko khana khilane ke liye logon ko targheeb aur talqeen nahi karta.

Ab iss ayat me bhi teen alfaz hai, wo hai Yahuzzu, Ta’am aur Miskeen.

YAHUZZU ( He Urges ) 69:34

Yahuzzu ka root ya maddah Hay, Dhaad, Dhaad hai, iss ka matlab amada karna, targheeb karna, talqeen karna.

TA’AAM ( Food ) 2:61

Ta’aam ka root ya maddah Ttoay, Ain, Meem hai, iss ka matlab Khana, food, paani ke liye bhi aya hai, jannat ka maza ya chakhne ke liye, eating yani khane ke liye aur khilane ke liye istemaal huwa hai.

USKUN ( Dwell ) 2:35

Uskun ka root ya maddah Seen, Kaaf, Noon hai, iss ka matlab, rehne ka ghar, aram-gaah, raat ka aram karna, theherna, paani ka zameen me theherna jaise talab, ghareeb ya miskeen, sukoon bhi issi se hai. Miskeen – ghareeb ko iss liye kaha jata hai kyun ke wo ek jagah se apna rizk nahi kamata, bheek maange ke liye ghoomna parrhta hai, shayed issi liye chaakhoo ko bhi sikkeen kaha gaya hai, kyun ke uss ko kaatne ke liye chalana parrhta hai, harkat hogi to chaakhoo kaategi.

Lafz-e-Yateem ki detail me hum miskeen ki detail bhi sunn liye hain Quran ki rooh se. Ab jo detail ahadith me ayee hai, wo hai;

  • Islam me bheek maangne ki mumaniyat hai, to yahan farmaya ke, miskeen wo nahi jo ek ghar se doosre ghar bheek maangta phirta hai, jiss ko ek niwala ya ek se do khajoor de kar door kar dete hain. Balke miskeen wo hai, jo ghareebi ke bawajood, kisi se bheek nahi maangta, aur na uss ko dekhne se aisa lagta hai ke ye zaroorat mand hai.
  • Jo shaks, bewa’on aur miskeeno ya ghareebon ko madad karne ki koshish me lag jata hai, wo aise hi hai jo Allah ke raaste me jung kare. ya aise shaks ki tarah jo mashghool ho jaye Allah ki raat bhar ibadat kare aur din bhar roza rakhe.
  • Sadaqa ameeron ko nahi di ja sakti, siway inn paanch logon ke,
    • Jo Allah ke raaste me jung kare,
    • Jo Uss sadaqa ko jama kare,
    • Jo kharz ada nahi kar paa raha ho,
    • Jo apne maal se uss ko khareed le,
    • Aisa shaks jiss ka ghareeb ya miskeen padosi ho, aur uss ko sadaqah diya jaye, jiss se wo ameer aadmi ko tohfa de.
  • Jo Roza nahi rakh sakte unn ke liye aya hai ke, wo Ghareebon ko ya miskeeno ko khana khilaye, ek roza chhoota to ek ghareeb ko khana khilaye, ye unn chhootte huwe roze ka kaffara hai.
  • Aur waada-khilafi ka kaffara 10 logon ko khana khilana hai, aur Ibn Umar RA har ghareeb ko ek mudd gehoo diya karte the.
  • Miskeen jaisa ahadith me zikr aya hai, jo bohot hi ghareeb hai uss ko diya karo, chahe wo ek bhuna huwa paya hi kyun na ho.
  • Sab se behtareen sadaqah wo hai, jo tum apne ghar walon par ya ghareeb rishtedaro par kharch karte ho. Wo sadaqah bhi count hoga aur sila-rehmi karna bhi count hoga.

Surah Al Kauthar ki tafseer me hum sunn chuke hain ke ek socio-economic nizam ko qayem karna hai jo masajid se nikal kar musalman ummat ko faida pahunchaye;

  • To wahan hukum aya tha ke, “Fasalli lirabbika wanhar”, Apne paalne wale malike ke liye Namaz parrho, gunah se bachte huwe, aur qurbani karo. Qurbani karne ka kya maqsad hai, yateemo aur ghareebo aur miskeeno ko khana khilana, Qurbani karne se to poora ek economic system wabasta hai, economy revive hoti hai aur kayee logon ko kaam milta hai.
  • Yahan afsos zahir kiya gaya unn logon ke liye, jo yateem ko sahih treatment nahi deta, unn ka khayal nahi rakhta aur miskeeno ko khana khilane ke liye doosro ko targheeb nahi karta.
  • Phir Yateem ki detail me – unn se shadi karne ki ijazat di gayee, wahan hum sunn chuke hain ke, wo poore Madina ke City-State ke financial system ko control karne aur jo 70 sahaba shaheed huwe unn ke families ko financial support ke taur par shadi karke apne ghar me laane ka hukum huwa. To iss tarah ek economic problem ka solution diya gaya, Allah (سُبْحَانَهُ وَتَعَالَىٰ) ki taraf se.
  • Phir jab maal-e-ghanimat aya, kaseer tedaad me, to uss me se jo hisse hone chahiye uss me – phir rishtedaar, yateem, miskeen, rishtedaar padosi, ajnabi padosi, waghairah ko distribute karne ka hukum aya aur kaha gaya ke, ye iss liye hai kyun ke, daulat tumhare ameeron me hi na ghoomti rahe.
  • Qanoon-e-Qudrat ye hai ke;
    • Jo paani hai, wo oonchai se beh kar neeche aata hai, ye qudrati taur par, hota hai. Water flows from higher level to lower level.
    • Voltage bhi, higher potential se lower potential ki taraf flow karta hai, ye Allah SWT ka banaya huwa natural law hai.
    • Waise hi daulat ka bhi ek natural law ye hai ke, wo Ameer se ghareeb ki taraf flow hona chahiye, issi liye Quran aur Ahadith me yateemo aur miskeeno par kharch karne ka hukum hai.
  • Ab yahan do economic systems jo raaij hai, iss duniya me, unn par ghaur-o-fikr karte hain;
    • Russia me, socialist nizam implement kiya gaya, aur kaha gaya ke, har shehri barabar hai, economically, status wise, waghairah. Iss se kya huwa?
    • 80 saal ke andar bahar Russia economic equality ki wajah se toot kar reh gaya.
    • Iss surat me ghaur-o-fikr karne ki dawat di gayee haih, to ghaur kariye kyun toota Russia?
    • Iss ki misaal aise hi hai, jo pani ki misaal humne suni, pani higher level se lower level ko flow karta hai, to pani ko ek hi level par kar denge to kya hoga, wo flow nahi karega.
    • Waise hi, Ameer aur Ghareeb ko ek level par kar denge, to kya hoga, currency flow nahi karegi, economic system baitth jayega.
    • Aur Russia me aisa hi huwa.
    • Duniya ke aksar mumalik, Capitalist nizam implement kar rahe hai, Soodi nizam, jo ulta kaam kar raha hai, ghareeb se paisa ameer ki taraf ja raha hai.
    • To iss ki misal aise hi hai, pani ko lower level se higher level par bhejna, to kya karna parrhta hai?
    • Pump lagana parrhta hai. Jo unnatural tareeqa hai, uss me zor lagana parrhta hai.
    • Aaj kal kya ho raha hai, capitalist nizam ko jo mumalik apna rahe hain, wo ghareebon aur miskeeno ke liye policy banane ke bajaye, ameeron ko aur ameer banane ke liye, policies bana rahe hain.
    • Iss ka nateeja kya hoga, economy baitth jayegi, iss ki jhalak humne 2008-2009 ke recession me dekhe, jiss me governments ke paas kya solution tha?
    • Sadaqah karna. To ye log kya kare? banks ko tabahi se bankruptcy se bachane ke liye billion of dollars bankon me wapas daalne parrhe. Economy ko stable karne ke liye.
    • Ghareeb se paisa chooss kar ameeron ko denge to economic system baitth jayega.
    • Aur agar ghareeb ko paise denge to wo kya karega?
    • Wo ja kar apne ooper kharch karega, aur ye natural process se paisa phir ameer ke paas hi ayenga. Aur uss ko zakat aur sadaqat ke zariye phir ghareeb ke paas pahunchaya jayega.
    • Islamic hukumat me khulafa-e-rashideen ke daur me, ye qanoon implement karne ki wajah se aisi khushhaali aayee, ke zakat dene wale bohot ho gaye, zakat lene wale nahi bache.
    • Zakat ko raaste par chhorrh kar chale jaate the, lene wala koi nahi bacha.
    • Ye hai Islam ka socio-economic nizam.
    • Ye hai, aqeemus-salaat aur Aatuz zakaat ka matlab. Ye saath saath hai, namaz parrhna hai, ritual hai, uss ke saath hi ye nizam bhi khayem hona hai.
    • Issi liye immediately next ayat me farmaya, “Fa Wailul Lilmusalleen” aise namaziyon par afsos hai, jo yateemo, ghareebon, miskeeno ka khayal nahi rakhte, unn ki financial madad nahi karte.

Comments are closed.